Debi cu e no tin visa pa drenta
LIMA: E muher Duiliana Sánchez Pereira naci na Venezuela, ta bin ta bibando mas di un luna caba den e seccion di vuelo internacional di Aeropuerto Jorge Chávez na Lima, Peru, pasobra e no por drenta e pais como turista debi cu e no tin un visa, y su permiso di estadia no ta valido. Esey ta loke oficialnan di Inmigracion na Peru a confirma.
Via di un boletin, Inmigracion Peruano a indica cu e pasahero stranhero di 28 aña di edad, ta keto bay den e seccion di transito internacional di e Aeropuerto, y esey ta segun su mesun deseo, sin cu e ta deteni of ta tene cuenta di e notificacion cu e no ta admisibel pa drenta e pais, duna door di Inmigracion dia 31 di Januari 2024.
“E persona aki a haci un peticion pa bolbe revisa su peticion pa solicitud di asilo, cual peticion ya caba a wordo declara infunda pa e Comision Special di Refugiadonan di Ministerio di Relaciones Exteriores. Ademas e pasahero a start un caso sumario tambe den Corte, segun Inmigracion a splica.
Den cuadro di esey, Inmigracion a aclarea cu den e ultimo 12 lunanan, y den cumplimento estricto di ley, nan a nenga mas di 660 stranhero di diferente nacionalidad di drenta e pais ey na Aeropuerto aki. E restriccionnan aki ta bin debi cu hopi biaha e pasaheronan no tin visa, cu ta un exigencia cu Gobierno di Peru a introduci pa algun nacionalidad, pa motibo di seguridad y cu tin algun cu a wordo expulsa y ta trata di drenta bek.
E muher Diuliana a yega na 2019 na Peru hunto cu su mayornan, y e tabata trahando ta representa diferente marca. Sinembargo el a perde su documentonan di identidad y permiso di trabao durante un viahe pa Europa na September 2013. Un ladronicia na Italia a cambia su bida, ora cu delincuentenan a bay cu su cartera. Den esey e tabatin su paspoort y su permiso di trabao na Peru.
Na Italia mes, Diuliana a bishita Embahada di Peru pa pidi permiso pa e drenta bek e pais, pero esaki a wordo nenga. Nan a bise aki cu e tin di bay na Embahada di Venezuela pa obtene un documento cu lo bay djis permiti’e regresa su pais di origen.
