ORANJESTAD(AAN): E aña aki ta bay ta di dos aña cu Cas di Cultura ta bay organiza ‘Little Stars, Festival di Teatro Infantil’.
Durante un conferencia di prensa Director di Cas di Cultura Vicky Arens a splica cu Cas di Cultura durante ultimo añanan a bin di promove e arte di teatro cu diferente proyecto cu hendenan conoci den e mundo aki.
“Nos ta mirando cu poco poco pero sigur, porfin e arte di teatro na Aruba ta bezig ta crece y ta hayando hopi atencion”.
E fin di aña aki nos ta bay deleita boso tambe cu ‘Grease The Musical’, segun Arens.
El a sigui bisa cu ‘Little Stars’ ta un proyecto special pa Cas di Cultura, pasobra esaki ta involucra netamente esunnan mas chikito y muchanan di scol basico.
Unda cu aña pasa 3 scol a participa, e aña aki ta bay ta 4.
E director a splica cu e tipo di proyectonan aki ta wordo haci, pa inculca e creatividad y amor pa teatro y pa duna e muchanan e confianza cu nan por para riba un stage y ta creativo.
El a gradici Prins Bernhard Cultuurfonds y Familie Harry Koeman Fonds op Naam cu a yuda pa haci e proyecto aki posibel.
Segun Arens, despues di oranan di scol e muchanan ta haya nan les di teatro.
Ferdinand Franca, docente di Drama na Colegio Nigel Matthew y dunador di les tambe na Abraham de Veer School a indica cu pe ta un honor pa traha cu e muchanan despues di scol, mirando cu na scolnan basico y scolnan special e tipo di lesnan aki ta basta limita.
“Nos kier pa e muchanan ta involucra cu arte, pasobra arte ta hopi importante”.
Arte no ta solamente canta, balia of actua, sino e ta tambe traha riba habilidadnan social y bo auto estima, segun Franca, kende a indica cu arte tin hopi beneficio.
El a sigui bisa cu e 4 scolnan cu ta bay participa e aña aki ta St. Dominicus College, Pius X school, Mon Plaisir school y Sint Anna school.
E tema e aña aki ta di ‘cuenta di ada’, pero cu un bachi nobo.
E aña aki lo uza e storia di Sneeuwwitje (Sneeuw Blanco), unda cu e intencion ta bin cu un version nobo di dje.
“Nos ta bay haya 4 storia original, crea y traha pa e muchanan mes”, segun Franca kende a indica cu e muchanan mes ta crea nan décor tambe.
Dia 25 di Mei e show ta bay tuma lugar.
