BOGOTA: Un tragedia di berdad ta loke un famia na Colombia a pasa aden, ora cu un mucha chikito a bira malo y muri,
despues cu el a come un mangel cu a resulta di a wordo fabrica cu droga. E mucha di 11 aña di edad ta biba den bario El Rincon den e localidad di Suba. El a muri despues di a come algun mangel tipo ‘gummy’ cu tabata contene substancianan toxico, mientras e ta wordo cuida na cas di su tanta.
“Mi ruman muher y mi sobrina tabata na e puesto di Biña Cora, y un cliente a drenta y el a duna nan algun mangel di gummies. Y nan a trece e mangelnan aki cas y a laga nan riba mesa,” e mama di e muchanan a bisa e canal RCN Noticias. E muchanan a haya riba un mesa e mangelnan, y cada uno a come un, y mesora nan salud a wordo afecta. E mangelnan parce tin e substancia LSD, cu ta causa halucinacion.
E mucha a cuminza halucina, y tabata bisa nan cu e ta mira imagennan straño, y a pidi lechi y despues yudanza di su famia. Despues el a cuminza grita di dolor. Aki ta unda cu nan a core transporte pa Hospital na Suba, y despues pa Hospital Simon Bolivar. Pero aki su situacion a deteriora y e mucha a muri. Su ruman muher mas grandi di 15 aña tambe a keda intoxica cu e mangel.
Awor Departamento di Sijin di Polis Metropolitana di Bogota a cuminza cu investigacion. E curpa di e mucha a wordo pasa den varios test riba ordo di Ministerio Publico, y e resultadonan lo bay determina e causa di e fayecimento tragico aki.
