Parlamentario Ricky Hoek (MEP):
ORANJESTAD (AAN): Parlamentario di Fraccion di MEP, Ricky Hoek a expresa cu e comienso di e di dos siman di aña escolar nobo, ta sigur cu aworaki tur alumno, maestro y mayor a pasa e fase di suspenso y tension. Alumnonan tabata warda cu ansiedad ken ta bira nan meneer of juffrouw, si nan ta den e mesun klas cu nan amigonan, con e rooster nobo ta hinca den otro?
Pa e maestronan tambe ta un suspenso. Cuanto alumno tin den e klas, e rooster tin un ‘lesuur’ liber den dje? Y naturalmente e mayornan tambe ta den espera di un rooster favorabel pa nan yiu(nan). Ki ora scol ta caba, cuanto buki mester lesa e aña aki? Tur ta preguntanan genuino cu cada alumno, maestro y mayor ta puntra, Hoek a indica.
Motivacion y oportunidad
Pero loke ta sigur ta cu un aña escolar nobo ta trece motivacion y oportunidadnan nobo. Entre otro un comienso nobo unda tanto e alumno, maestro y mayor tin e chens pa laga tur experiencia negativo y ‘strugglenan’ atras.
E parlamentario a agrega cu ademas, e aña escolar nobo ta ofrece e oportunidad pa e alumnonan explora interesnan nobo. Cu cada aña nobo e alumnonan ta profundisa nan mes mas den e materianan, y asina ta fomenta un crecemento di conocemento, pensamento critico, y nan desaroyo personal.
Lasonan di amistad lo fortifica of lo conoce amistadnan nobo. E relacion triangular entre alumnonan, maestronan y mayornan ta importante pa un bon comunicacion, comprendemento y experiencia educativo placentero pa cada partido, a bisa.
Proyectonan nobo y positivo
Pueblo di San Nicolas ta conoce 2 proyecto educativo importante. Danki na e colaboracion entre Minister di Enseñansa sr. Endy Croes, DPS, conseheronan y e scolnan Colegio Nigel Matthew y Abraham de Veer School a logra 2 proyecto importante.
E prome ta habrimento di e prome klas di VWO 3 na Colegio Nigel Matthew. Aworaki, e alumnonan di pariba por sigui nan carera di VWO na Colegio Nigel Matthew cu ta mas cerca di nan cas.
E di dos ta un proyecto nobo caminda a habri un 'schakelklas' na Abraham de Veer School. Esaki ta un proyecto special caminda ta 'vang op' e alumnonan di un edad poco mas grandi cu tin dificultad cu hulandes cu no por bay un scol basico y mester sigui e trayecto di MAVO.
Tin 15 alumno cu a inscribi pa e proyecto aki, y na caminda nan lo 'stroom door' den e sistema regular di MAVO 1 of 2. E 'schakelklas' aki ta un ‘vangnet’ cu ta brinda e alumnonan e oportunidad pa sigui nan scol den un trayecto traha na nan capacidadnan, Ricky Hoek a expresa.
Palabranan di exito
Di tal forma un aña escolar nobo ta brinda diferente posibilidad na e crecemento personal y intelectual. Door di brasa e comienso nobo y enfoca riba e aspectonan positivo, tanto e alumnonan, maestronan y mayornan por crea un experiencia educativo satisfactorio y gratificante. Hopi exito na tur alumno, maestro y mayor cu e aña escolar nobo 2024 – 2025, asina parlamentario Hoek a finalisa bisando.
