Siman a cuminsa riba un mal nota
- Ainda tin hopi trabao pa preservacion di monumentonan
ORANJESTAD (AAN): Stichting Monumentenfonds Aruba (SMFA) ta lamenta di a haya sa e siman aki, cu a basha abao un cas den e area historico di Rancho.
Como fundacion encarga cu preserva monumentonan di Aruba, nan ta traha hopi di cerca cu otro organizacionnan y inversionistanan cu interes pa inverti den edificionan historico. Pa brinda informacion y tambe conseho.
E area di Rancho sigur ta un cu pa hopi aña tin nan atencion mirando cu nan ta mira un potencial grandi pa desaroyo di e area cual ta un bario rico na historia y herencia cultural. Un ehempel di esaki ta e forno di Kalki cu a inverti den su restauracion y e watertank cual a haci investigacionnan caba pa su conservacion.
Asina nos tin contacto tambe cu comerciantenan cu interes den e area p’e importancia di conscientisacion y asina duna nos sosten pa desaroyo di e area conservando su balor historico.
Pa loke ta trata Ranchostraat 2-4 cu ta e cas cu a keda basha abao riba Dialuna, varios biaha den pasado a busca pa un solucion pa cu un redestinacion pa e cas. Monumentenfonds den pasado a traha di cerca hunto cu diferente instancianan riba opcionan pa realoca e habitantenan e tempo ey pero sin exito.
Nan ta consciente di e retonan social cu tin den e area y específicamente den e area di e cas na Ranchostraat 2-4 ya pa varios aña. Apesar di esaki nan tabata positivo cu por a yega na un solucion pa tur partido envolvi y asina desaroya e area.
Algun tempo pasa Monumentenfonds a keda informa di plannan pa basha e cas abao precisamente debi na e situacion ariba menciona y a atende esaki mesora indicando e interes di parti di SMFA pa yega na un solucion pa evita cu e cas bay perdi hasta si esaki ta encera tuma y of cumpra e cas.
Lamentablemente riba Dialuna a tuma e decision di “sloop” e cas sin previo aviso.
Awor e cas aki cual SMFA ta considera tabata parti di nos herencia cultural, a pesar di no tabata conta cu un status di monumento proteha pa ley, awor no tey mas.
E incidente aki ta ilustra un biaha mas e vulnerabilidad di edificionan den areanan historico cu no ta conta cu proteccion. Tambe ta mustra di un banda e necesidad urgente pa mas proteccion di casnan y edificionan priva, di otro banda e importancia di conscientisacion di e comunidad pa cu Aruba su herencia cultural, cual SMFA a bin ta enfoca riba dje pa algun aña.
Monumentenfonds sigur ta traha di cerca cu tur instancianan encarga cu proteccion di monumentonan y Aruba su herencia cultural.
Dialuna despues di a tuma nota di e noticia di e ‘sloop’ na Ranchostraat a tuma contacto cu Ministerio di Cultura y Monumentenbureau como e instancia encarga cu proteccion pa asina expresa un biaha mas nos preocupacion tocante e necesidad urgente pa proteccion di edificionan historico.
Nan ta consciente cu tin basta desaroyo positivo ta tumando lugar e ultimo temponan. Entre otro a cuminsa proteha algun monumento priva cual ta e caso di por ehempel Kapel di Alto Vista y e aeropuerto di Dakota. Y por ehempel na Wilhelminstraat por mira hopi iniciativanan priva pa restaura monumentonan dunando nan un bida nobo. Pero ainda tin hopi trabao pa haci riba e tereno di preservacion di monumentonan na Aruba.
Stichting Monumentenfonds Aruba sigur ta haci un yamado na un y tur cu ta doño di un cas historico of ta desea mas informacion si un propiedad tin un balor monumental pa tuma contacto cu e instancia concerni cual ta Monumentenbureau.
Pa cualkier duda, conseho pa un proyecto di restauracion y interes den huur/compra di un cas of edificio monumental por semper tuma contacto cu Stichting Monumentenfonds Aruba.
