Na opinion di Quito Nicolaas
ORANJESTAD (AAN): E conocido investigador di asuntonan di reino, esta Quito Nicolaas, a declara cu desde e yegada di president nobo di Merca, Sr. D. Trump a introduci un politica nobo, di isolacion. Esaki a trece cu ne cu p.e. na Europa tambe lo mester bin un otro politica pa defende nan mes. Den futuro lo no por conta demasiado riba Merca. E systema di regionalismo a gana tereno awor.
Hulanda formando parti di Europa tambe lo mester asumi un posicion den tur esaki. Den e proximo decadanan e paisnan den Europa no solamente lo mira un stagnacion di nan economia, pero tambe e multiple cambionan y problemanan social cu esaki lo trece cu ne. Y pa e motibo ei Hulanda ta haya su mes forza pa bin cu un cambio den e relacion di Reino Hulandes.
No solamente pa fortifica nan posicion, pero tambe pa activa UN structura nobo di relacion entre Hulanda y e paisnan - Aruba, Corsou, Bonaire, St. Maarten, Saba y St. Eustatius - cu ta formando parti di Reino Hulandes.
Un di e alternativanan ta cu cada un di e islanan ta bira politicamente independiente, pero ta keda mantene e lazonan y sosten politico-financiero-economico di Hulanda. Esaki mester wordo delibera ampliamente y ratifica den un documeneto gubernamental. Nos mester acepta y reconoce cu nos ta un micro-estado cu cierto limitacionnan financiero-economico. Sinembaro por yega na un combenio por ehempel cu Hulanda, cu tur exportacion di Hulanda pa America Latina y Caribe lo sosode via di e hafnan di e islanan den Reino cu por brinda e servicio aki.
Segun Nicolaas, mester tene cuenta si cu un cambio asina aki lo trece cu ne cu hopi empresa Hulandes lo establece su mes riba e islanan aki pa forma parti di e desaroyo economico nobo aki. Ademas esaki lo no mester nifica cu ta e Europeonan so ta haci e trabao, pero e propio yiu di tera mester ser entrena y prepara pa tur e funcionnan. Esaki mester ta ancra den documentonan cu ta firma cu otro.
Banda di esey lo mester cuminsa cu un proceso di reformacion. E periodo di Covid-17 caba tabata un señal cu Turismo no ta e pilar mas di nos economia y cu lo mester busca otro alternativanan. Acerca lo mester enfoca mas tanto riba tecnologia moderno, si nos ke keda competitivo cu un economia limita.
Den e mundo moderno aki, si nos ke keda competitivo nos lo mester sigui capacita nos mes pa futuro. Nos mester ofrece nos hobennan e posibilidad pa nan (re)capacita nan mes na un nivel mas halto, asina cu nan por ocupa e funcionnan aki. Ya caba nos por ripara e hoben di awendia ta scohe pa sigui studia mas halto enbes di bay traha y gana un cachi-cachi. Lo mester bin un inventarisacion/investigacion nobo pa evalua den cua sector nos por brinda servicio y sigui crece. Y conhuntamente cu Hulanda mester percura pa tin e centronan di (re)capacitacion riba e islanan, asina cu e hoben por haci un cambio di carera.
E anteriormente islanan menciona y St. Maarten lo mester sinta na mesa pa bin cu un programa di accion pa analysa unda tur nan por presta nan servicio. Y con lo por haci esaki den un forma adecuado. Lo mester trata di bin - considerando e desaroyonan internacional - cu un instituto na Aruba pa e hobennan cu ta interesa den tecnologia moderno, manera Inteligencia Artificial.
