Cu companianan di UTV y ATV...
ORANJESTAD (AAN): E problema di UTV’s y ATV’s ta uno cu desde varios aña ta existi un necesidad pa atende cu ne. E daño y impacto riba nos naturalesa ta inmenso, e peliger y cantidad di accidentennan ta hopi preocupante y e keho y molesternan di esnan cu ta sintinan mes afecta ta subi cada dia.
A instala un Comision multi disciplinario consistiendo di diferente departamento y stakeholders, manera DNM, DTP, DIP, DTI, DOW, ATA, DWJZ, DIMP y KPA pa asina sondea e posibilidadnan y yega na un conseho. E conseho di e comision a ser presenta den conseho di minister dia 13 di augustus 2024. Tin retonan basta grandi mirando cu e ta un tema compleho y teniendo cuenta cu tur e leynan exsistente. Mientrastanto a instala tambe un taskforce multidisciplinario pa asina eherce e control y a baha e cantidad di vehiculonan den un caravana na un maximo di 10.
Un sub-comision di DNM, DOW y DIP a dialoga y inventarisa cu varios di e companianan. Ta remarcabel pa bisa cu un mayoria ta consciente cu e posibel daño na nos naturalesa, e peligernan pa e usuario y tin comprension pa e molester cu ta ser causa na habitantenan riba e ruta.
Durante dialogo cu a tuma luga diabierna mainta cu e companianan, Minister Arends y su ekipo a trece su proposicionnan dilanti basa riba e consehonan di e comision como tambe su puntonan di bista pa un periodo di transicion exitoso.
E fase transitorio lo tuma luga pa e proximo 3 aña, cuminsando 1 di januari 2025 y lo termina na 2028, den cual e vison ta cu den 2028 tur compania a cambia nan actividad pa uno cu ta den harmonia cu naturalesa. Entrante 1 di januari 2025, lo apunta tres ruta alternativo, regula desorden y velocidad, y alavez crea espacio di regeneracion di areanan di naturalesa afecta (natuurgebieden y natuur en landschap). Pa 2026 lo pone fondonan disponibel pa “micro transition loans”, unda companianan chikito por aplica pa yuda cu e transicion pa un otro negoshi. Pa sigui incentiva e transicion di e sector lo traha cu programanan di certificacion den cual ta reconoce companianan cu a demostra boluntad y curashi pa cuida nos naturalesa y alavez stimula actividadnan diferente.
A palabra cu esnan presente cu e proposcionnan lo ser publica dia 24 di september 2024 riba publico.aw bou di e categoria -consulta- pa asina companianan por duna nan punto di bista por escrito.
Minister Arends ta finalisa bisando cu “Nos economia ta Naturalesa, cu boluntad y compromiso nos por yega na e harmonia cu henter Aruba merece”.
