ORANJESTAD (AAN): Recientemente Ministro Arthur Dowers uni na desea e funcionario Mayvir Orman hopi exito.
“Mi ta desea Mayvir "Aruban Earthquake" Orman, miembro di CEA, tur clase di exito den su preparacion y den e importante reto internacional cu tin su dilanti,” Ministro Dowers a indica.
Dia 19 di september 2026, Mayvir lo subi riba escenario principal (Main Event) di South American Fighting Championship (SFC) na Asunción, Paraguay, unda lo representa Aruba den e combate pa e prestigioso SFC International Light Heavyweight Championship (93 kg) contra un atleta profesional di Argentina.
Prome cu e gran pelea aki, Mayvir lo sigui prepara den un training camp intensivo na Bogotá, Colombia, cu e meta di representa nos bandera cu orguyo.
E dedicacion, disciplina y perseverancia cu Mayvir ta mustra ta un inspiracion pa hopi hoben Arubiano y un ehempel di con esfuerso y compromiso por hiba un atleta te riba escenario internacional.
Bureau di Minister Dowers completo y demas personal di CEA ta desea Mayvir hopi forsa y exito. Aruba ta cu bo!
