ORANJESTAD (AAN): Recientemente Minister di Enseñansa Endy Croes a reuni cu sindicato TOPA, esta presidente Sr. Alonso Tromp,
vice-presidente Sr. Axel Figaroa y Sr. Roderick Lee. Ademas di esaki, Señora Morela Dirkz y Señora Miguelina Flores di Dienst Publieke Scholen (DPS) tambe tabata presente den e ocasion aki.
Durante e reunion, Minister Endy Croes a scucha diferente punto en conexion cu Colegio EPI. Varios docente y/of empleado cu falta MB of cu tin varios aña trahando riba un basis contract.
Den e cuadro aki, TOPA representando e docente- y empleadonan di Colegio EPI, a trece nan puntonan dilanti. Minister Endy Croes y DPS a tuma nota di e puntonan aki y lo bay trata nan pa brinda atencion na e inkietud di e docente y- empleadonan di Colegio EPI.
Fuera di esaki, Ministerio di Enseñansa a splica TOPA tocante e cambionan grandi cu Colegio EPI ta traspasando aden desde aña 2022, en conexion cu innovacion di 8 estudio (opleiding). Durante e reunion a splica cu si no pasa den e proceso di renobacion di e estudionan aki, den futuro e diploma di Colegio EPI no lo worde reconoci.
E mandatario di Enseñansa a enfatisa cu e procesonan aki ta tuma basta tempo. Finalmente, Minister Endy Croes a indica cu lo atende e peticionnan di e empleadonan y dentro di algun siman lo bolbe reuni pa mira e avancenan. Finalmente, Minister Endy Croes gradici e sindicato TOPA pa e trabao cu nan ta haciendo y e docente- y empleadonan di Colegio EPI pa nan pasenshi.
