ORANJESTAD (AAN): Recien e Premio Excelencia den Deporte a reconoce Carlos Benjamin pa contribui den e desaroyo di deporte di Aruba.
Carlos Benjamin a nace na Aruba na aña 1960 y a cuminsa practica e deporte di basketball desde cu e tin 19 aña di edad. Sr. Carlos a hunga den diferente seleccion di basketball. Fuera di tur esey, Carlos tabata referee di basketball y lider di delegacion di varios seleccion di basketball.
Ademas di esaki, e baluarte deportivo a bay Weganan di Reino na diferente pais pa representa Aruba entre otro, St. Maarten, Curaçao y Bahamas. Actualmente, Sr. Carlos ta train mucha- y hobennan entre 5 pa 18 aña na Basketball Club na San Nicolas.
Sr. Carlos a expresa cu e ta un honor pa sigui cu e trabao y motiva e muchanan pa practica deporte. Premio Excelencia den Deporte y Minister Endy Croes ta gradici Sr. Carlos Benjamin cu e gran trabao cu el a haci den mundo deportivo. Cu disciplina, deseo, dedicacion y determinacion ta logra. Aruba ta orguyoso di bo.
