Minister Mervin Wyatt-Ras:
ORANJESTAD (AAN) Minister di Salud Publico y Asuntonan Social, señora Mervin Wyatt Ras, a bisa den un conferencia na Colegio Educacion Profesional Intermedio (EPI), cu esnan cu ta encarga cu e cuido di adulto mayor ta hacie di un calidad adecua y cu e adulto mayor por tin un bida digno y por wordo cuida na un forma profesional tambe, basa riba cierto normanan di cuido.
“P’esey tambe e cooperacion entre e dos Ministerionan: Enseñanza y Asuntonan Social y tambe e Departamento di Adultonan Mayor (Ouderenzaken), a firma conhuntamente cu Colegio EPI un MOU (Memorandum Of Understanding), p’asina nos por coopera cu otro y percura cu e personanan cu ta cuida di nos grandinan, por ta prepara adecuadamente, pa medio di e ‘L.L.O Traject’. Esaki ta un inicio y mester wordo evalua despues, p’asina wak kico ta e beneficionan con pa sigui”, e dignatario a señala.
Minister Mervin Wyatt-Ras ta kere cu e ta un muestra tambe cu gobierno kier bay den e direccion aki pa hisa e calidad di cuido den e caso di nos grandinan, y p’esey mester di tur e partnernan. “Y mi kier pa nos y nos partnernan pone nos nanishi den e mesun direccion. E ta hopi importante pa nos trahando tambe riba e asuntonan di calidad cu nos adulto mayor a presenta tambe na nos, y cu nos tin cu bay enberdad implementa, hunto cu nos casnan di cuido y p’esey tambe lo mester bay den e trayecto tambe pa e personanan cu ta trahando cu nos hendenan grandi por señala, nan por tambe duna e cuido di calidad, nan por registra, nan por zorg pa tin seguridad, pa e siguientenan cu lo mester traha cu nan y e ora ey nan por haci esaki tambe na un manera califica, basa riba formacion adecuado, y esey nos ta haciendo den e proyecto aki”, e mandatario a señala.
E ta kere cu, cu e sosten di cada un e trayecto por bira realidad y un exito. “Mi kier felicita y gradici tur nos partners y tambe na Minister di Enseñanza p’asina nos por traha hunto, y pa nos ofrece y haci posibel pa nos hendenan wordo interesa den e trayecto aki”, Minister Wyatt-Ras a relata.
