ORANJESTAD (AAN): Prome Minister Evelyn Wever Croes Diahuebs durante un conferencia di prensa a trece dilanti cu e ta lamenta
cu den e dianan aki tin atakenan cu ta wordo lanza den direccion di diferente instancia, manera Landsrecherche, Censo y Ministerio Publico.
“Esaki ta algo totalmente no aceptable den comunidad di Aruba, pasobra akinan nos tin reglanan di decencia, norma y balornan”.
Nos institutonan cu ta independiente, no mester wordo ataca ni lastra di e forma ey, segun e Prome Mandatario.
El a sigui bisa cu ora cu politiconan kier bay den debate nan tin cu haci esaki cu otro politiconan y no cu e institutonan aki.
“Pesey mi kier pidi tur ciudadano di nos pais pa no cay den esaki, pasobra nos institutonan ta traha independientemente y asina mester ta tambe”, segun Wever Croes, kende a duna un ehempel di un atake riba director di Censo algun dia pasa, unda cu tin hende cu a bisa cu e lo tabata corupto, prome cu e firmanan por a wordo completa.
“Si bo ta kere cu un hende ta corupto bo tin cu bay Ministerio Publico cu prueba y Ministerio Publico ta atende bo”.
Despues cu parlamentario Benny Sevinger a wordo deteni, nos a scucha un cantidad di hende bisa cu Ministerio Publico ta marioneta di Gobierno, siendo cu tur hende sa cu no ta asina, segun e mandatario, kende a sigui bisa cu OM ta un instituto totalmente independiente den su trabao y no ta duna cuenta na Gobierno of consulta cu Gobierno.
El a sigui bisa cu como parti di Reino tin hopi bista ta wordo tira riba funcionamento di OM y Gobierno, pa asina garantiza cu OM por haci su trabao independiente.
“OM tin un equipo profesional y tin un Procurador General nobo cu ta inspira confianza, ta habri cu tur hende y ta comunica cu tur hende, pues nos no mester tin ningun duda den e posicion independiente di OM den cualkier investigacion, segun Wever Croes.
El a indica cu durante e tempo cu AVP tabata den Gobierno un minister di AVP a wordo deteni den un investigacion, pues eynan bo ta wak cu OM ta independiente.
E mandatario a bisa cu diripiente awor si OM no ta independiente mas.
“Mi ta haci un apelacion na tur lider politico y na algun miembro di prensa cu ta haci mal uso di e situacion aki, pa ban ta sensato y ban uza nos sentido di responsabilidad pa nos por yuda e pais aki pa dilanti”.
Lidernan politico tur sa y periodistanan tur sa cu OM tin un posicion independiente y bo por yega cerca nan cualkier momento cu un pregunta.
No para na banda pa ataca of instiga, pasobra esey ta cosnan cu no ta aceptable, segun Prome Minister.
