Historicamente e ta bay gana menos di loke un CEO ta gana na Aruba si compar’e cu e CEOnan anterior
ORANJESTAD (AAN): Den un entrevista cu DIARIO, Minister di Turismo, Transporte y Labor, Sr. mr. Wendrick C. Cicilia a indica na momento cu el a asumi e encargo como Minister di Turismo, el a sinta cu Royal Shiphol Group na unda cu a firma un MOU pa reinstitui e cooperacion strategico cu e grupo aki. Sinembargo, esaki a bin cu cierto condicionnan di banda di gobierno y di banda di Royal Schiphol group.
E minister a enfatisa cu un condicion di parti di Royal Schiphol Group cu a crea mas atencion, tawata e hecho cu nan a pidi un excepcion na e ley di LNT pa nombra nan CEO. “Mas cu claro, nos a desea y ta keda desea nos propio CEO local. Den Conseho di Minister nos a expresa nos deseo tambe pa tin nos propio CEO na banda di e CEO cu a wordo provee pa Royal Schiphol Group. Discusionnan riba esaki ta sigui otro aña”, Minister Cicilia a duna di conoce.
E salario di e CEO, e minister a indica, tambe a causa hopi consternacion den pueblo. E minister riba esaki a enfatisa, cu fruta di e negociacion tawata cu e CEO aki ta esun cu menos ta bay gana den historia di loke un CEO ta gana na Aruba si compar’e cu e CEOnan anterior.
Tambe e minister a remarca cu den e MOU cu a firma, Gobierno di Aruba a enfatisa pa Royal Schiphol Group, cu ta maneha varios aeropuertonan internacional na mundo, inverti intencionalmente den expertonan local pa nan tambe cuminsa adkiri experiencia internacional pa na Aruba tambe nos por tin talentonan local cu por maneha aeropuertonan local y internacional, y duna nan e oportunidad pa sigui eleva y crece.
Finalmente, Minister Cicilia a expresa cu den Conseho di Minister ya a tuma e decision pa revisa e ley di LNT cu, den e caso aki, ta perhudica varios di nos profesionalnan.
