Nan tey pa yuda completa e proyecto Gateway 2030
ORANJESTAD (AAN): Minister di Turismo, Transporte y Labor, Sr. mr. Wendrick C. Cicilia a declara durante un entrevista cu DIARIO cu el a ricibi un carta di Sindicato STA den cual STA ta cita algun preocupacion entre otro pa loke ta trata e nombracion di un CEO nobo.
Minister Cicilia a indica cu na momento cu el a asumi e responsabilidad, el a encontra un relacion, especialmente cu Royal Schiphol Group, completamente distorciona. A reestablece y reactiva e cooperacion strategico aki y construi bek e brug di cooperacion cu nan.
Minister Cicilia a reitera e importancia di Royal Schiphol Group pa Aruba den a fase di transicion y expansion di nos aeropuerto. E proyecto di Gateway 2030 ta wordo coordina pa profesional y expertonan di Royal Schiphol Group. Segun e minister, na momento cu el a asumi e responsabilidad, tawata tin un retraso amplio den e proyecto. “Nos a logra di acelera e proyecto aki cu ta wordo financia door di ‘lenders’ cu ta facilita capital na aeropuerto di Aruba pa inverti den e proyecto di expansion.
Segun e mandatario, e preocupacion grandi di e lenders tabata e hecho cu Royal Schiphol Group a notifica gobierno y e ex-minister di Turismo señor Dangui Oduber, cu nan ta bay termina e colaboracion strategico aki cu segun e minister, lo a nifica cu e proyecto lo a sigui cu un retraso grandi cu lo no por a scapa mas y lo a tuma hopi aña pa completa esaki mientras e ta un proyecto cu a wordo determina y coordina pa termina prome cu 2030.
E minister a duna di conoce cu el a sinta cu Royal Shiphol Group unda cu a firma un MOU y a reinstitui e cooperacion strategico cu a bin cu cierto condicionnan di banda di gobierno y di banda di Royal Schiphol group. Un condicion ta pa e proyecto Gateway 2030 termina y Royal Schiphol Group tey pa yuda completa e proyecto aki. E lenders tambe cu ta facilita e capital na aeropuerto, tabata preocupa con lo continua e cooperacion, awor ta aprecia y ta sinti nan mes confia y cu trankilidad cu e presencia di Royal Schiphol Group na Aruba.
