*Cu participacion di SEPPA y e trahadornan
ORANJESTAD (AAN) – Minister di Transporte Ursell Arends, a declara durante e encuentro cu SEPPA, trahadornan di Arubus y prensa, cu e dia aki mes Hunta di Comisario lo haya un carta unda cu e mandatario ta pidi un reorganizacion completo di e compania cu participacion di e trahadornan, y di e forma aki por cuminza traha pa rescata e compania.
“Mi ta duna te cu fin di e luna aki pa bin cu un plan structural con nos ta bay anda cu e fondonan pa asina rescata e compania aki.
Dialuna ultimo, mi a ricibi un carta di Gerencia caminda cu e ta exigi, of ta pidi un suma substancial, pero sin ta propone ningun solucion structural, y di e forma aki nos no por sigui anda.
Pesey awe, Raad van Commissaris lo haya un carta, manera mi a bisa unda mi ta exigi un reorganizacion completo di e compania cu participacion di e trahadornan p’asina aki nos cuminza traha pa rescata e compania, na bienestar di su trahadornan pero tambe na bienestar di e comunidad di Aruba, cu mester di e servicio y ta depende di e servicio cu boso ta brinda”, Minister Ursell Arends a reitera enfaticamente.
Secretario General di SEPPA a aborda e mandatario y bise cu un reorganizacion no ta e solucion cu mester aworaki, y a pidie un contesta riba e carta cu el a ricibi, anto no mas laat cu Diabierna di e siman aki. E minister a reitera kico e ta pidiendo Raad van Commissaris mas pronto posible, y cu den e siguiente dianan lo tin informacion riba esaki. Magaly a keda insisti cu nan mester un decision mas inmediato, y e dignatario a bise cu e lo haya un contesta e dia aki mes.
