ORANJESTAD (AAN)—Minister Ursell Arends a menciona den entrevista cu DIARIO, cu gobierno a inverti den compra di barinan pa Serlimar,
y nan ta bay yega na Maart proximo, y ademas, a pone fondonan adicional pa cumpra mas bari.
E dignatario a subraya cu di e forma aki Serlimar por haya cliente nobo, y tambe pa esnan existente tin productonan cu por ofrece nan.
E meta ta pa cuminza cu separacion di desperdicio den e areanan publico y e ultimo temponan tambe, Serlimar ta hayando critica tocante e barinan cu tin banda di e hotelnan y di e beachnan.
Arends a bisa cu el a sostene combersacionnan cu su colega Oduber, mirando cu ora di traha e proyecto aki Serlimar ta esun cu a bende e barinan, pero no ta responsable pa lanta e sushi. E mandatario a subraya cu akinan mester yega na un miho entendimento pa asina e pick up di e sushi por bay mas optimal. Esaki ta un proyecto cu a wordo financia door di e fondonan di turismo, y den dje Serlimar a bid pa pone e barinan pero e no a gana e bidding pa haci e parti di uphall.
E mandatario a bisa cu na su parecer ta mas optimal si Serlimar ta responsable pa tur dos. El a agrega cu e cu su colega Minister Oduber a combersa caba riba e tema aki pa wak si Serlimar por ofrece e servicio di lanta e sushi tambe, pa e ta mas optimal y mas frecuenta, y pa minimaliza cu sushi ta wordo poni rond di e barinan tambe.
Tambe e minister a duna di conoce cu siman pasa Serlimar tabata bezig den Village, y e ploegnan a haci limpi den varios area, y tambe e ta participa activamente den Baki den Bario, y ta sigui brinda e servicio na esnan cu no tin pick up, un bez pa luna, durante e actividad aki. E aña aki tambe ta bay cuminza cu e capping na Parkietenbos, dentro di poco e cura nobo ta wordo traha, ta atende cu e problema di asbesto, y fuera di esey lo atende cu e seroe mes, y otro aña lo cuminza atende cu e tereno pa e bira un parke solar.
