ORANJESTAD (AAN) – Durante ultimo dianan, Minister di Transporte Ursell Arends, a sinta cu varios di e stakeholders importante pa locual ta e servicio di transporte publico na Aruba.
Asina e mandatario a duna di conoce, refiriendo na e gruponan cu ta representa tanto e taxistanan, como chofernan di autobus.
Minister Arends a aplica cu nan a discuti riba puntonan importante y su persona a splica nan cual ta e maneho cu e, como minister di transporte, kier hiba, den e temporada venidero.
“Nos a elabora riba puntonan cardinal pa loke ta trata e futuro di transporte publico na Aruba, y den esaki mi a informa nan cu e ministerio ta bay introduci un moratorio pa un aña largo, cu ta ‘kept’ diferente di e verguningnan pa asina aki, hunto cu Universidad di Aruba, conduci un estudio pa brinda e informacion necesario pa fiha e maneho, cu datonan concreto” e mandatario a duna di conoce.
Esaki ta e informacionnan cu ta wordo traspasa na tur e representantenan di taxista y di autobus.
El a agrega cu nan a discuti tambe riba e tema di vestuario y ambos grupo ta hopi contento di a scucha esaki, cu ta algo cu nan tambe ta busca. E minister ta sinti cu gruponan aki ta sostene e punto di bista aki, pa bin cu un vestuario pa tanto taxista, como chofernan di autobus.
Arends a agrega cu ademas, conhuntamente cu e director di Departamento di Transporte Publico (DTP) señor Theo Kock, lo bay traha hunto cu e ministerio, cu ta bay dune tur e hermentnan necesario pa digitaliza e proceso di DTP, pa haci esaki mas transparente, pa asina cada uno sa na unda nan tin cu aplica pa un vergunning, pa nan sa na unda nan ta den e proceso y nan mes por trek esaki online.
“Mi ta kere cu esaki ta pasonan y avancenan cu kizas ta chikito, pero pa un departamento asina aki cu tin e responsabilidad di brinda hopi permiso na nos ciudadanonan, por canaliza esaki y haci’e un proceso optimal, unda ta kita tur e dudanan y percepcion eyfo, cu mester depende di un fabor politico, pa yega na un vergunning.
E dignatario ta kere cu door di e tecnologia cu tin awendia lo brinda oportunidad pa esaki lo yega tambe na e taxistanan, chofernan di autobus, y tur doño di vergunning cu tin den nos comunidad.
“Mi por bisa, reunionnan sumamente positivo, y mi ta spera cu esaki cu comunicacionnan cu a wordo habri aworaki por keda tuma lugar durante e proceso. Esaki ta e compromiso cu mi tin cu e gruponan, y mi ta spera cu poco-poco, pueblo tambe lo bay mira y compronde kico ta e maneho cu nos ta hiba pa trece cambionan grandi”, minister Ursell Arends a conclui.
