ORANJESTAD (AAN) – Minister Presidente Evelyn Wever-Croes, a elabora den conferencia di prensa, tocante e Dia Internacional pa Elimina Violencia riba Hende Muher y mucha muher.
Minister Presidente a bisa cu aki na Aruba, un di cada tres hende muher ta bira victima di violencia, y esaki ta algo hopi preocupante. El a subraya cu no ta trata solamente di abuso fisico sino tambe abuso emocional, verbal.
“Pasobra hopi biaha, cu palabra bo por haci mas daño cu, por ehemplo, abuso fisico. Y mi ta kere cu e impacto cu esaki tin no solamente riba cada un di e hendenan muher aki pero riba su yiunan, y henter e famia; con bo ta afecta un mucha for di chikito, cu ta lanta cu un trauma asina. Esaki ta e momento cu nos tin cu analiza e señalnan alarmante den nos comunidad a consecuencia di violencia contra hende muher, y pesey mi ta kere cu aworaki nos ta bisa cu esaki ta basta”, e mandatario a remarca.
E mandatario a agrega cu tin solucion. E solucion ta den nos propio man pa cada un di nos traha pa stop violencia contra hende muher, tanto violencia fisico como verbal door di esnan cu ta kere cu nan por insulta, ofende y humilia hende muher, simplemente pasobra nan ta hende homber.
“Awe mi kier haci un apelacion na henter comunidad, pa nos para hunto y bisa cu ta basta y ta stop violencia contra hende muher” Minister Presidente a expresa y a señala cu ban haci esaki no solamente pa e hende muher victima, pero pa su yiunan, mama, tata, nan famianan y pa henter comunidad di Aruba.
“Hunto nos por pone un fin na esaki. Hunto nos por para violencia fisico y verbal contra hende muher!” e dignatario a conclui.
