Ademas di a elogia Minister di Husticia y su ekipo:
ORANJESTAD (AAN) – Diaranzon mainta, den conferencia di prensa y firmamento di un acuerdo (huurovereenkomst) entre gobierno y APA (pa renovacion di edificio di Polis Maritimo), Minister Presidente, señora Evelyn Wever-Croes, den nomber di Gobierno di Aruba, a gradici APA, na prome lugar, y Aruba Hospitality Security Foundation, pa a extende un braza y yuda gobierno na e momentonan aki.
“Mi kier gradici Cuerpo Policial, especialmente Polis Maritimo, cu pa hopi tempo tabata ubica den edificionan cu no ta esnan di mas adecua. Aworaki, gobierno ta presentando un solucion pa esaki, y dentro di seis luna nos tin un facilidad hopi mas adecua pa Cuerpo Policial por eherce su trabao na un forma ideal, manera nan ta haciendo. Mi kier gradici specialmente colega Rocco Tjon y su ekipo, pasobra esaki ta e tipo di solucionnan cu gobierno tin cu busca y sigui busca. Aruba ta pasando den retonan grandi, covid-19 a dal nos hopi mas duro cu nos a kere cu e lo dal nos, y mientras, nos ta purba lanta cabes di e pandemia, y nos ta purba reconstrui nos pais, dentro di e espacio financiero limita cu nos tin, e tipo di solucionnan asina, innovativo, practico, den cooperacion y colaboracion, ta locual cu lo yuda nos pa nos sigui bay padilanti. Nos sa cu e tempo tras di lomba, ta haci dos aña cu nos ta aden, tabata hopi dificil, specialmente den e caso aki, pa nos Cuerpo Policial.
Agentenan di KPA no solamente pa motibo di sacrificionan financiero di salario, pero tambe presion di trabao. Nos no por coregi tur cos aworaki, nos ta depende ainda di e sosten di likidez di Hulanda, pues nos tin cu cumpli cu e condicionnan di Hulanda, pero esey no kiermen cu nos no por traha riba otro aspectonan pa mehora e ambiente di trabao di cada un empleado publico di Pais Aruba y den e caso aki di Cuerpo Policial”.
E dignatario a reitera su gratitud na minister Rocco Tjon y henter su ekipo, cu ta sigui busca solucionnan con pa atende, apesar di tur e retonan y di e limitacion financiero di gobierno, y mehora e condicion di bida di e empleadonan publico.
El a desea nan hopi exito cu e proyecto nan dilanti, y ta spera cu e keda cla na tempo, pa cumpli cu Cuerpo Policial tambe na tempo, y ta spera cu den seis luna por mira enberdad un resultado hopi bunita di esaki.
