ORANJESTAD (AAN): Minister Geoffrey Wever a reuni cu Presidente di Camara di Comercio, Sr. Kemmerling, y
Director di Camera di Comercio, Sr. Balkenstein, riba diferente punto di atencion relevante pa economia y cu merece atencion.
Cada seis siman Camara di Comercio di Aruba ta reuni cu Minister di Asuntonan Economico, Geoffrey Wever, pa discuti y strategia riba diferente topico y pa haci palabracion concreto cu ta na fabor di comercio na Aruba.
E topiconan di e reunion di e siman aki tabata entre otro (1) e resultado di Trade Mission pa Suriname cu Minister di Asuntonan Economico a organisa hunto cu Camara di Comercio y ATIA, (2) e problemanan riba mercado laboral y falta di personal adecua, (3) e cobranza pa haci uso di e portal digital di Camara di Comercio, (4) e contract entre WEB Aruba N.V. y Eagle LNG, (5) participacion di Aruba na un posibel Trade Mission pa Panama, (6) un update di e plannan pa revitalisa San Nicolas y Oranjestad, (7) e estudio cu Minister Wever a laga haci riba e structura macro economico di Aruba su economia door di Professor Roger Hosein hunto cu Hulanda, (8) e ayudo cu Aruba ta bai ricibi di United Nations pa desaroyo e FINTECH sector na Aruba y (9) proceso pa certifica Oranjestad como un Capital Culinario.
'Den e reunion aki nos tabata tin e oportunidad pa intercambia di idea over e topiconan aki. Mi ta considera Camara di Comercio un partner valioso di nos Ministerio, y nan input, consehonan y preocupacionnan semper ta wordo tuma den consideracion. Un economia no por florece si no ta pa e forza di sector priva y pa e motibo ey dialogo continuo cu sector priva ta sumamente importante', segun Minister Geoffrey Wever.
