ORANJESTAD (AAN) – Minister di Enseñanza y Deporte, Endy Croes, a referi den conferencia di prensa di Dialuna 14 di Maart awo, na su viahe na Hulanda, di cual a bolbe Aruba Diadomingo atardi, hopi satisfecho.
Minister Endy Croes a papia di un biahe hopi fructifero, unda su persona a atende, entre otro, e Reunion di Ministernan di Enseñanza di Reino Hulandes, cu ademas di su persona como dignatario di Aruba, tabata presente señor Robbert Dijkgraaf di Hulanda; sr. Sithree van Heydoon di Curacao; sr. Rodolphe Samuel di Sint Maarten.
E mandatario a menciona cu hunto cune a biaha dos persona; un ta e directora di Directie Onderwijs Annemarie Proveyer-Groot, y e Rector di Universidad di Aruba Viola Heutger. Nan a forma parti di e delegacion cu a acompaña e dignatario y asina atende un total di 17 punto di agenda, cu tabata tin pa wordo discuti. E ministernan di Curacao y Sint Maarten tambe a bay cu nan respectivo delegacion. Ademas tabata presente e director internacional di e Bureau di Minister Dijkgraaf, Herbert Kunst a reuni hopi cu e mandatarionan, den reunionnan separa, y dos halto funcionario mas.
Minister Croes a menciona cu na final di e reunion aki a firma un conclusion final, entre e cuater ministernan. Croes a subraya cu minister Robbert Dijkgraaf a atende nan super bon, y nan a cera un tremendo amistad cune.
