ORANJESTAD (AAN): Diabierna mainta Minister di Enseñansa y Deporte Endy Croes a bishita scol basico Colegio Ora Ubao na Tanki Leendert.
E mandatario a wordo ricibi di un manera hopi special door di e alumnonan cu tabata para na entrada di scol cu bandera di Aruba den nan man.
Durante e bishita Minister Endy Croes a comparti informacion di e historia, bida y trabou Betico Croes n’e alumnonan di e dos 6de klasnan. E meta ta p’e alumnonan conoce e historia y importancia di e lucha cu Betico a hiba pa henter e pueblo di Aruba pa por a logra e Status Aparte. Ta importante pa conoce e historia di Status Aparte.
Betico Croes a unifica e pueblo aki a traves di bin cu un bandera y himno. E alumnonan tabata scucha cu hopi atencion, tabatin hopi pregunta. Na final nos a haci e alumnonan pregunta y remarcabel ta cu e alumnonan tabata sa caba diferente faceta di e historia.
Despues di e presentacion nos a pasa saluda tur e klasnan. Minister Endy Croes ta gradici e cabesante di e scol sra. Nanette Vingal Lacle, tur e docentenan y specialmente e alumnonan pe bunita recepcion y p’un mainta asina ameno.
‘Ban recorda y celebra Dia di Betico pe herencia bunita cu e la laga atras, nos Status Aparte’, e mandatario a finalisa.
