ORANJESTAD (AAN): Durante su bishita na Hulanda, minister di Enseñanza Endy Croes a reuni cu e asina yama Regiegroep di e proyecto Studie Success Caribische Studenten,
hunto cu Ron Bormans di Hogeschool Rotterdam y lider di proyecto Nicole Spellen(Hogeschool Amsterdam), kende ta Arubiano.
Esaki Croes a bisa durante un conferencia di prensa Dialuna mainta.
“Ocho Hogeschool ta trahando hunto riba e proyecto aki y una vez cu cristaliza esaki lo keda amplia pa por acopla mucho mas Hogeschool, cu lo bay atende cu tur e dolornan cu tin, segun e mandatario.
El a sigui bisa cu el a reuni tambe cu e mentornan cu ta atende cue studiantenan Arubiano cu bay studia na Hulanda.
Croes a splica cu el a sinta basta largo cu e mentornan y cu nan a duna un presentacion di power point, pa mustra e cantidad di inkietud cu tin y esaki ta cuadra cu locual e Ombudsman a skirbi den su rapport.
“Nan tabata hopi satisfecho cu nos a dedica e tempo aki pa por a scucha y ta bon director di Directie Onderwijs tabata tey tambe y mi a pidie pa traha un verslag mesora riba e parti aki, esta un plan di accion cu nos ta bay duna pa cruza e brug aki pa e studiantenan”, segun e minister kende a sigui bisa cu e mesun atardi ora cu el a caba di reuni cu e mentornan, el a reuni cu studiantenan tambe pa scucha for di nan kico ta nan inkietud y e problemanan cu cual nan sa wordo confronta.
E mandatario a splica cu tin di e problemanan cu cual e studiantenan ta wordo confronta na Hulanda ta severo y cu e intencion ta pa atende cu esakinan.
