Minister Gerlien Croes
ORANJESTAD (AAN): Durante un entrevista cu DIARIO, Minister di Educacion, Gerlien Croes, a duna un splicacion amplio tocante e ley cu ta regula e aumento di salario pa docentenan. E Minister a enfatisa cu e schaalering di onderwijspersoneel (personal di enseñansa) ta wordo regula den un ley separa, diferente for di esun pa otro ambtenaarnan. Segun e minister, e sistema di schaalering pa personal di enseñansa ta compleho, cu hopi nivel.
E minister ta indica cu mas o menos 10 aña pasa, a inicia un proceso pa introduci un sistema di functie waardering – e tempo ey conoci como functiehuis – cu meta di evalua cada trabou haci den e campo di enseñansa. Den e sistema aki, por ehempel, un docente cu a gradua for di HBO, tin 5 aña di experiencia laboral y a sigui un cantidad di curso di formacion, lo ser evalua y a base di su conocimiento y preparacion, lo haya un schaal salarial corespondiente.
Sinembargo, e proceso a keda stagna pasobra despues di varios discusion, a surgi preocupacion cu si e evaluacion di funcion wordo implementa, lo tin discrepancia grandi entre, por ehempel, HBO’ers den enseñansa y esnan cu mesun nivel den otro departamento gubernamental. Segun Minister Croes, despues di esaki, a pasa basta aña sin ningun movecion pa loke ta salario den enseñanza.
E minister a indica cu, durante formacion di gobierno na aña 2024, sindicato Simar a presenta un conseho cu a ser prepara pa un comision special. E conseho aki tabata basa riba tres proposicion esencial. Despues di analisa e proposicionnan, varios pregunta importante a surgi.
Geleiktrekking: E prome ta, e geleiktrekking salarial no tabata completo. Den enseñansa primario, nunca a ser logra un nivel salarial igual cu enseñansa secundario. E diferencia salarial ta rond di mil florin pa luna. Esaki ta representa un discrepancia hopi grandi, pasobra den pasado a subi e schaal salarial di voortgezet onderwijs, mientras cu esun di primair onderwijs a keda pendiente.
E fondo tampoco tabata acopla na un bevorderingsbeleid. Den ambtenaarij, den e ultimo añanan, ora ta otorga un aumento, mester tambe duna oportunidad pa desaroyo, por ehempel mediante cursonan pa profesionalisacion. Esaki no ta acopla den e sector di enseñansa, mientras cu esaki ta algo hopi esencial pa crecemento profesional di docentenan.
Presupuesto cu nada: Y tampoco tabatin presupuesto reserva den Presupuesto 2025 pa cubri e aumento salarial di docentenan. Aworaki, segun Minister Croes, a pone un suma den Presupuesto 2026, basa riba calculacionnan y diferente opcion pa gelijktrekking salarial. E intencion ta pa simplifica e proceso di schaalering di docentenan, pa crea un bista mas cla di con e docentenan por sigui crece den futuro. E Presupuesto 2026 a ser entrega na Parlamento dia 1 di September.
E minister a splica cu Minister Geoffrey Wever a inform’e cu e ta premira un crecemento economico na unda cu otro aña ta bay tin un tiki mas entrada y por aloca extra cen acerca riba e fondo cu ya tabata destina pa enseñansa. Esaki a conduci na bay bek na mesa cu e comision interno na unda cu nan a haci un berekening di nobo cual e minister a ricibi oficialmente diaranson ultimo.
Siguientemente, e Minster Croes a sinta cu Financien pa analisa e proposicion y dialoga riba kico Land Aruba por carga tambe den e añanan binidero, pasobra, segun Minister Gerlien Croes, aumento di salario mester wordo implementa den un manera structural, cu sostenibilidad pa e añanan cu ta bin.
