ORANJESTAD (AAN) – Minister di Salud Publico, Dangui Oduber, den e conferencia di prensa Diaranzon mainta, pa duna un actualizacion di e situacion di Covid-19 na Aruba, a expresa cu por considera esaki un situacion explosivo, den e sentido di cantidad di casonan positivo.
E mandatario a indica cu e positivity rate, desde cu e crisis aki a cuminza dia 13 di Maart di aña 2020, nunca a experiencia un aumento asina drastico di casonan, manera den e dianan aki.
E dignatario a subraya cu logicamente esaki ta trece preocupacion cune y tambe e grado halto di positivity rate cu tin na e momentonan aki, na Aruba.
E dignatario a menciona cu e bon noticia ta cu hospital ta bao control, tin suficiente capacidad, y no tin ningun persona interna den ICU, na e momentonan aki, y tin algun pashent den e piso pa covid-19 pero no tin motibo pa panico ainda.
Minister Oduber a agrega cu pa Hospital tin su retonan ainda, ya cu tin cantidad di personal di Hospital cu na e momentonan aki ta malo na cas, cu a test positivo y no por labora, y esaki ta trece cu ne cu Hospital tin capacidad, tin suficiente cama, pero no tin suficiente personal pa atende si en caso ta bin admisionnan nobo.
E mandatario a comenta cu Departamento di Salud Publico ta sigui hopi di cerca, tur e investigacionnan cu ta wordo haci relaciona cu e variante nobo Omicron, y den tur esakinan e resultado preliminar ta indica cu e ta hopi mas contagioso, y por mira esaki na Aruba tambe con lihe esaki ta, pero e ta menos peligroso y esaki sigur ta duna un aliento y un perspectiva un tiki mas positivo, en comparacion cu e otro variantenan cu mester a deal cune.
E ta spera cu esaki enberdad ta menos peligroso, y por mire si na Hospital unda cu e situacion ta bao di control, y mester mantene asina tambe pa e proximo dianan y simannan nos dilanti, pa asina Aruba por surpasa e peak halto cu e ta confrontando actualmente.
E dignatario a referi na e booster shot cu a cuminza algun siman pasa y cu ta canando bon te aworaki. Un total di 12.125 persona a ricibi nan booster shot caba.
Minister Oduber a subraya cu ta mas cu necesario pa introduci medidanan pa frena e contagio cu tin na e momentonan aki, na Aruba. El a bisa cu tin hende ta puntra pakico si ta sigui vacuna ta tuma medida y di con Aruba no a yega na herd immunity ainda. Durante e campaña di vacunacion, gobierno a splica cu pa por yega na e herd immunity lo mester tin 85% di nos comunidad cu a ricibi nan vacuna.
“Ainda, lamentablemente nos tin cu bisa cu nos no a yega eynan. Te na e momento aki 62% di nos comunidad a vacuna y pa e pais yega na nos herd immunity mester di 85% of 90% di hende vacuna. Kiermen, ainda tin un caminda pa cana, pa nos yega eynan; pasobra tin un grupo den nos comunidad cu, sea no ta kere den e vacuna, of tin otro motibonan cu pa nan por ta valido, cu no kier tuma e vacuna” Minister Dangui Oduber a señala.
