ORANJESTAD (AAN): Minister Andin Bikker a habri diaranson cu un felicitacion na tur esnan envolvi diamars anochi
pa diaranson marduga den e operacion bon planea y ehecuta pa stroba un grupo di 24 persona indocumenta di drenta e isla via Rodger’s Beach.
Tanto Cuerpo Policial, Wardacosta y Guarda nos Costa a hunga un rol esencial den e operacion aki.
Minister Andin Bikker ta contento di mira su esfuersonan haci, traduci nan mes den un maneho mas eficiente y cu resultado positivo den mantencion di orden publico y miho control riba nos costanan.
E mandatario a percura pa entre otro tin un radar sofistica pa nos Cuerpo Policial, duna mas autoridad y cumpra hopi ekipo necesario pa ehecuta e plan strategico. Y resultadonan positivo di e esfuersonan menciona cada bes ta bira mas y mas bisto.
Den e caso specifico aki, e radar cu a busca pa Cuerpo Policial Aruba, a detecta e boto for di momento cu a sali for di Venezuela caba. Asina a logra sigui su trayecto y a ward’e aki na costa for di prome cu el a drenta nos awanan teritorial. Asina cu el a yega cerca di costa, a aborda e boto y a obliga e capitan pa hiba e boto waf di Barcadera pa un control.
Polis maritimo a logra intercepta un boto sin nomber cu un motor chikito di 40 horsepower drentando Aruba cu 22 persona indocumenta, compaña pa un capitan y un tripulante. E dos ultimonan aki ta den man di husticia, pa duna cuenta relaciona cu e acusacion di mensenhandel y mensen smokkel. E demas personanan indocumenta a bay Guarda nos Costa pendiente nan deportacion bek pa Venezuela.
Minister Andin Bikkerta felicita tur e departamentonan y tur cu a duna un man, pa hunto nos tene nos costa y nos isla mas sigur. Tremendo trabou!
