Fe, Speranza y Amor di Mike den Caya Grandi ta haya un vuelta
*Salida di candidatonan importante ta dal den cara di Mike Eman
*Wendrick Cecilia ta keda bou dominio di Mike como unico lider
ORANJESTAD (AAN) — Informantenan clave di DIARIO tin varios dia ta informa di situacionnan tenso cu ta biba den seno di AVP cu tabata tin un lista di accion prepara pa culminacion di e caminata di e partido pa eleccionnan 2024.
Manera a wordo splica na DIARIO, e AVP actual ta resultado di e maniobranan di Mike Eman, cu awor ta haci Pueblo di Aruba kere cu el a opta pa pone un hoben na cabez di lista di e partido y asina a marca un epoca nobo den historia di e partido.
Informantenan ta indica cu for di momento cu Mike Eman a dicidi cu Aruba mester acepta Benny Sevinger den Parlamento y Mike Eman a exigi pa Benny Sevinger como delincuente keda den Parlamento di Aruba y gana placa di Pueblo, den seno di partido AVP turbulencia a aumenta.
Turbulencia cu semper tabata presente y cu otronan a acepta pasobra den partido AVP ta Mike Eman ta na mando hunto cu su grupito directo.
Como politico encarga cu gobernacion di Aruba, Mike Eman a bira un fayo historico cu a destrui e bienestar di Aruba y a haci cu awe hoben y pensionado mester paga e debenan cu el a laga como su herencia como gobernante.
Aunke Mike Eman a manca bienestar di Aruba, den partido internamente el a sa di keda cu cierto sosten mas ainda pasobra den e partido mes ta e ta dicidi.
E union total entre Mike Eman y Benny Sevinger tabata tin como resultado, cu candidatonan importante pa e partido manera Gerlien Croes y Rycond dos Santos a kibra cu Mike Eman.
Aki mester trece dilanti cu te awe den e Pueblo votador di Aruba ta keda cuestiona si e kiebra entre Mike y Gerlien ta realmente kiebra pa semper of despues di eleccion nan por bolbe uni forza.
Realidad ta cu Mike Eman a perde votadornan, cu hasta tabata wordo considera su sucesor ya cu Mike Eman mes, manera DIARIO a splica tanto biaha ta alcansa edad di Pensioen di Behez, pa cual e ta bringa tanto.
En todo caso, Mike Eman lo a dicidi na tene na su grupo di fielnan y a cuminsa cana den direccion di eleccion cu su persona como number 1 di e lista di partido AVP, den cual el a duna prueba di ta e lider absoluto y ta dicidi hasta pues pone un banda e loke a bini dilanti den sentencia di Huez cu Benny no por ta riba su lista pa bay eleccion loke a haci cu Mike Eman a percura pa Benny Sevinger keda bon representa riba su lista ora Benny Seveinger despues di elecciom riba orden di Huez no por bolbe Parlamento.
Sinembargo, Benny Sevinger ta sigui gana placa di Pueblo di Aruba den Parlamento mientras Mike Eman a prepara su lista pa eleccion y riba e lista originalmente lo tabata tin su “good old club”na e puestonan mas prominente loke a causa malcontento den e partido.
Informantenan a splica cu Mike a rabia y pesey Mike a dicidi cu e ta hunga e wega cu e ta bay ultimo ariba lista, cu no ta nada special si tene cuenta cu loke Mike a haci den pasado ora el a exigi pa como persona den detencion preventivo, Benny Sevinger por a wordo eligi como miembro di Parlamento di Aruba den eleccion anterior.
DIARIO a mira portret di Mike Eman cu su gruponan ta invadi cayanan di sigur Playa pa asegura cu Benny Sevinger ta haya voto.
Na e momentonan aki loke Mike Eman a haci ta, cu e problemanan grandi cu tin den seno di AVP, pone e hoben Wendrick Cecilia, cu originalmente lo no a bini prome cu Mike su fortalezanan di semper.
Ta ora Mike Eman a haya su mes den problema serio den su partido, el a dicidi cu e ta bay ultimo riba lista cu e confianza cu e ta haya mayoria di voto como votegetter di AVP, pues e persona mas importante den e partido,
Pues e hoben Wendrick Cecilia a wordo uza como peon segun informantenan den e wega di Mike Eman cu ya a dorna Aruba cu su imagennan grandi riba portret y ta keda e lider cu ta domuina den AVP cu mester wordo considera partido di Mike.
Wendrick Cecilia solamente por bisa cu el a bay number uno riba lista pero e number uno di Partido AVP ta keda Mike Eman, cu kier bolbe na e puesto di Prome Ministro di Aruba aunke historia ta indica con Mike Eman a desgracia Aruba cu e maneho cu el a hiba.
Informantenan a asegura cu loke ta pasa den seno di AVP no ta nada nobo. Ta Mike Eman ta manda. Ta Mike Eman ta lider di e partido. Ta Mike Eman ta number uno, cu a perde sosten di candidatonan, miembronan y simpatisantenan importante pasobra Mike Eman mester a keda tene man riba cabez di Benny Sevinger.
DIARIO ta ricibiendo informacion sumamente interesante y lo sigui informa su lectornan cu detaye!
