ORANJESTAD (AAN) — Den e prome investigacionnan di e caso Avestruz, por mira con autoridad a actua contra un cantidad considerabel di ciudadano,
cu lo por a haci nan mes culpabel di e ricibi un tereno contra leynan di Aruba y manera den e caso aki ta parce, na forma ilegal cu kiebra di leynan.
Den tur e tempo aki e atencion tabata concentra riba persona di Benny Sevinger, cu segun e sistema di gobernacion di Aruba, ta e Ministro cu por atende asuntonan di tereno, cu den un bon gobernacion no ta den man politico pa loke ta trata otorgamente di tereno pero den man di personal di e Departamento di Gobierno encarga pa asina evita corupcion y actuacion contra ley.
Segun informantenan Mike Eman por a reclama su luga den Parlamento, caminda su bos lo por a resona na otro forma, si e por a trece dilanti cualkier indicacion firme cu Ministerio Publico realmente lo tabata actua contra Ley.
Mike for di 2019 ora ya e investigacion a conduci na entrada den edificionan di sospechosonan, a sigui sconde mientras na momento cu Benny Sevinger tabata den problema, si el a grita y te awe ta grita cu Benny ta inocente.
“Mike no por laga Benny Sevinger cay,” informantenan a bisa DIARIO. Nan a mustra cu ta sumamente straño cu Benny Sevinger por a duna tereno sin cu Mike Eman como Prome Ministro y cu lazonan directo cu sigur varios di e otro sospochosonan, tabata na haltura. Esaki lo tabata implica cu Benny Sevinger lo mester a actua tras di lomba di Mike Eman, cu for di 2017 a nenga di haya su mes den un situacion cu e tabata forsa di ta den Parlamento.
DIARIO a ricibi prueba di e confiansa cu tabata tin oficinanan di Gobierno tempo di Gabinete Mike Eman, entre Mike y Benny. Den e Rapport di Algemene Rekenkamer ta wordo splica con Mike y Benny tabata dicidi kico lo pasa cu e fondo di 1.6 Miljard.
Mike y Benny hunto tabata dicidi con ta pone mas proyecto cu Pueblo mester a paga na companianan na un forma mal administra y contra bon maneho di placa di Pueblo.
Segun informantenan Mike no por laga Benny cay aunke ya dos sospechoso, hende hopi pega na AVP, ya ta den encarcelamento pa 60 dia, loke ta duna un peso mas grandi na nan status di sospechoso. E hendenan aki lo a haya tereno. E pregunta awor ta kende a duna tereno na un forma cu ta castigabel pa ley!
Un Minister no por dicidi kende ta haya tereno, pero si mester tin bista riba terenonan cu ta wordo entrega, e forma cu nan ta wordo entrega y decisionnan cu su Ministerio ta tuma y pa cual e ta responsabel den Parlamento.
E forma cu Mike Eman a dicidi cu Benny Sevinger lo keda riba lista di candidato, a wordo discuti riba base di moral pero awor si Husticia dicidi cu Benny Sevinger ta keda encarcela, lo tin un candidato di AVP ta busca voto pa eleccion 2021 den prison.
Si e personanan cu a wordo encarcela riba orden di Hues Comisario durante 60 dia no haya nan libertad prome cu eleccion, nan mester vota den prison na mes urna electoral cu Benny, si Benny Sevinger keda deteni.
DIARIO ta pendiente pa desaroyonan nunca bisto den historia politico di Aruba. E caso di Refineria di Aruba tambe ta bira importante pa Mike Eman, ya cu e no por laga sigur Mike de Meza y Alwin Koolman cay y bay sconde segun tur informacion entorno e luga cu Mike a ocupa den Citgo y Refineria di Aruba, cu tabata tin origen den Citgo.
