Otmar Oduber, lider di Plataforma Nos Pais:
*Tur esaki entorno construccion prome hotel na San Nicolas
ORANJESTAD (AAN)—Lider di Plataforma Nos Pais, Otmar Oduber a expresa su alegria, entusiasmo y felicidad pa mira cu enberdad, un proyecto den cual el a traha hopi duro riba dje, door di veredicto di Huez por sigui su desaroyo sin ningun estorbo.
E lider politico ta corda tempo cu ya caba tabata papia cu e grupo di Bahia Principe, cu tabata esun cu cual, bao Gabinete Eman, su persona a bay negocia y a logra firma pa e hendenan aki bin Aruba, y despues debi na fayecimento di e doño di e hotel aki, e proyecto no a sigui.
“Mi no a perde speranza, a sigui, a lucha, prensa mes a bay cu mi ora nos a bay na e firmamento di e acuerdo di e grupo nobo, e Grupo Martinon. Mi tabata tin e honor di por a combersa, convence e difunto tata di Enrique Martinon, cu ta e persona cu aworaki ta encabeza e negoshi di e famia aki di e cadena hotelero”, Otmar Oduber a splica.
Oduber a sigui splica cu pa por a cambia di idea nan tabata kier bin Aruba. Nan tabata papia di Palm Beach, y tabata tin varios encuentro, varios reunion, pa convence nan pa bay San Nicolas, y mustra nan riba e plan cu tabata tin e tempo ey, pa haci di San Nicolas e ciudad cultural, cu aworaki nos ta mira ta wordo crea. E tempo a cuminza cu e prome muralnan y henter e proyecto pa loke ta trata e pinturanan na San Nicolas. “Y mi ta asina orguyoso di tabata na cabes di esaki. Awo mi ta felicita señor Tito Bolivar. Mi tin cu menciona su nomber pasobra e ta un cu a keda kere den e proyecto, despues a hacie grandi manera cu e ta aworaki”, Oduber a subraya.
Tambe, diferente museo a wordo habri na San Nicolas, a renova San Nicolas Store, a percura pa Pamela Store, cu ta caminda Douane Kantor tabata ubica, y awo DNM teynan.
“A haci hopi inversion, a drecha Promenade y despues Caya Principal, y mi ta contento di tende Gobierno cu ta bay inverti y continua cu e proyecto aki, cu a wordo laga atras. Tur esaki, ora nos a convence e grupo pa bin Aruba despues di mas di 30-40 aña despues cu diferente gobierno, ministernan, tabata purba di haya un prome hotel na San Nicolas”, lider di Plataforma Nos Aruba, Otmar Oduber, a remarca.
