Meverly Romano, PR di DIMP ta enfatiza:
*Tur persona ta rekeri di haci cita!
ORANJESTAD (AAN) – Relacionista Publico di Departamento di Impuesto (DIMP), den entrevista cu Matutino DIARIO tocante e cantidad di cita y numbernan di auto cu a wordo entrega caba locual falta ainda, e comenta cu tin personanan cu a haci cita pero no ta na Aruba y como tal no por busca nan plachinan aworaki.
Tambe tin personanan cu a haci un cita pero cu DIMP ta ripara cu nan no ta presenta pa busca nan plachinan. Ademas, tin un grupo di persona cu a yama bisa cu nan no ta bay haci cita, pero ta warda na momento cu DIMP ta anuncia cu no ta rekeri pa haci un cita cu nan por djis cana bay busca nan plachinan.
“Wel, e mensahe na e grupo aki ta cu esey no ta bay pasa. Departamento di Impuesto ta continua cu e sistema di cita online, tur persona tin cu haci’e. Tur e gruponan di pensionado, personanan priva, companianan tur ta rekeri pa haci un cita. Nos ta continua cu e proceso, pakico? Pasobra di experiencia den pasado cu ora cu bo laga tur hende bay djis bay na nos edificio na otro banda akinan, pa nan busca nan plachi, bo ta haya un aglomeracion increible di personanan cu paramento den rij den solo. Nos a haya nos ta pone tent, nos a haya nos ta pone extra seguridad, hende ta pasa dilanti di otro, nan ta zundra, hera nan ta bringa cu otro eybao, hendenan para dos, tres ora largo tin ora hasta mas, ta bira anochi nos ta haya nos mes ta pone luz bao di tent y tur esey. E biaha aki, nos a structur’e di e forma aki, y p’esey e mes structura aki ta bay continua tambe den e lunanan cu ta sigui” Meverly Romano a enfatiza.
