ORANJESTAD (AAN): Director di SVb (Banco di Seguro Social) , como tambe Director Interino di AZV (Algemene Ziektekosten Verzekering), Edwin Jacobs a reuni cu Formador di Gobierno, Evelyn Wever-Croes.
Durante su declaracion na prensa Jacobs a duna di conoce cu tin algun punto cu ta necesario pa haya un 'uitspraak' politico riba kico ta bay para cu e fusion entre Instituto Medico San Nicolas (ImSan) y Hospital (HOH).
E forma habri y boluntario di cooperacion entre ImSan y HOH no ta na beneficio di e pais. Tin escasez di medionan pa inverti den salud di e hendenan y mester garantisa na e asegurado cu ta paga su prima tambe cu su prima ta wordo eficasmente y eficientemente uza, el a remarca.
E pregunta ta si na e momento aki na e forma cu ImSan y HOH ta funciona hunto banda di otro ta e mihor modelo pa garantisa e eficacia aki pa Aruba, Edwin Jacobs a expresa.
Politica tambe lo por duna un indicacion si ta bay continua cu e forma di financia e sector cu 'lumpsum'. El a bisa cu e ta considera 'lumpsum' un metodo no transparente, cu no ta promove eficiencia, sigur den tempo cu ta bay pidi e asegurado pa haci sacrificio. Pero mester garantis'e cu su prima ta bay wordo uza eficasmente na su beneficio, a enfatisa.
"E sistema di financia mediante 'lumpsum' na e momentonan aki no ta convence mi cu ta e forma pa financia cu ta contribui na e eficacia cu nos ta aspira", a bisa.
