ORANJESTAD (AAN) – Durante e conferencia di prensa di fraccion di MEP, parlamentario Shailliny Tromp-Lee, a hiba palabra y a elabora riba e Dia Internacional di Lenga Materno,
cu cual e siman aki a habri, y unda el a enfoca riba e importancia di salvaguardia, cuida y proteha “nos dushi Idioma Papiamento!”
Parlamentario Tromp-Lee a cuminza bisando cu ta responsabilidad di henter pueblo pa percura pa cuida y proteha nos dushi idioma Papiamento, cu nos mester realiza cu ta mucho mas cu un medio di comunicacion.
“Papiamento ta e manera con nos ta transmiti sentimento, comparti experiencia y conocemento, y no esey so pero tambe balor. Esaki nos ta traspasa usando e dushi lenga materno cu nos tin cu ta Papiamento”, e Parlamentario a expresa.
E dama a señala cu e mes ta mire como un reto riba caminda mirando cu Landspakket, pa loke ta trata e doorlichting di enseñanza, tin un punto crucial cu tin cu keda dicidi riba dje. Esey ta por ehemplo, lenga di instruccion den nos enseñanza, y tambe mester stipula un maneho, cu no ta directamente mara na e Landspakket pero cu, como pais, a bira ora pa enfatiza riba e necesidad pa bin cu un maneho nacional di nos idioma.
“Mi ta kere cu esey ta algo crucial y necesario, pasobra ta keda na cada un di nos pa no solamente keda papia nos dushi Papiamento corectamente, pero incentiva nos yiunan pa haci esaki tambe. Anto e ora ey mi ta un tiki autocritico, pasobra si mi wak mi mes como mayor, mi yiu mas chikito, di cinco aña, su juffrouw di scol ta comparti video cu nos anto por ripara cu ora e juffrouw ta puntra ‘ki bestia esaki ta?’ mi yiu no ta bisa ‘e ta un pato’ mi yiu ta bisa ‘e ta un doki’. E ta puntra otro muchanan y nan ta bisa ‘e ta un horse’ na lugar di cabay. Pues, ta hopi importante, pa cuida nos Papiamento”, Parlamentario Shailliny Tromp-Lee a remarca.
El a agrega cu esaki ta bay a base di fomenta pa nos muchanan ta mas involucra cune, papi’ e mas tanto posible, y no cay den e tendencia di kier fomenta un otro idioma, mas cu otro.
“Pero awe, riba Dia Internacional di Lenga Materno, djis un peticion na cada un di nos: Papiamento ta unico; tres Isla den e mundo aki ta papi’ e: Aruba, Bonaire y Curacao. Ta keda na nos sinti e importancia y enberdad sinti nos asina orguyoso di por domin’ e. Ban domin’e y use corectamente!” E parlamentario a subraya.
Shailliny Tromp-Lee a agrega pa tambe duna atencion na materia y manehonan cu ta asina necesario pa enberdad percura pa salvaguardia, cuida y traspasa nos Idioma Papiamento.
