Un mundo na candela no ta interesa den raza ni sexo di lider mundial
*Kamala Harris tabata Vice Presidente den sombra di Joe Biden
*Retiro di Biden y candidatura di Harris den situacion cuestionabel
ORANJESTAD (AAN) — Uno di e situacionnan mas serio cu a wordo presenta na mundo dor di Cas Blanco Mericano, pues Gobierno di Merca, den historia moderno, ta e loke a pasa e siman aki.
Pa ta sumamente sincero, nos hamas tabata di acuerdo cu na momento cu Joe Biden pa ultimo eleccion a anuncia cu su candidata pa Vice Presidente tabata un dama di color.
For di momento cu Joe Biden a papia di un “woman of colour” como su candidato, ya pa nos alarma a sona pa un epoca den cual dos aspecto peligroso a bini dilanti ora tabata papia di e persona, cu manera awor ta pasa, a subi e caminda pa bira un dirigente mundial.
Loke ta pasa na Merca na e momentonan aki, tin nos preocupacion grandi.
Conocedor di e sistema politico Mericano, introduci na nos personalmente dor di representantenan di Merca mes, nos no por ta di acuerdo cu na ultimo momento, Joe Biden ta dicidi di retira y den porta di e decision di su partido ta presenta Kamala Harris como e persona cu e ta sostene pa bira Presidente di Merca.
DIARIO na diferente ocasion, di acuerdo cu pensamento di hopi hende, a trece dilanti cu como Vice Presidente, Kamala Harris no a haya e oportunidad pa profila su mes como un dirigente mundial.
Ora nos papia di un candidato pa Presidente Mericano, nos ta papia di e candidato pa e puesto, cu mester dicidi kico lo pasa cu planeta Tera na un momento sumamente dificil, den cual Merca como lider mundial, na man di Presidente Biden no a demostra e forza cu nos a spera.
Nos no ta bay leu for di cas. Nos ta hisa cara y mira Venezuela, caminda Nicolas Maduro practicamente ta haci bofon di mundo liber.
Nos ta contempla mundo, hundi den desaroyonan den cual sigur e forza democratico di Merca mester ta sosten grandi pa e ansia mundial pa democracia pone un fin na tanto turbulencia.
Den tur frankeza nos mester admiti, cu nos a sinti falta di posicion firme di Merca, den un mundo caminda e cantidad di victimanan di opresion y abuso, ta crece diariamente y mundo a bira manera un planeta cu a perde su rumbo den orbita.
Merca ta un poder mundial y e dirigente Mericano ta mas cu un Presidente pa Merca.
E Presidente Mericano ta un lider mundial, cu no por wordo cualifica a base di su raza y sexo, pero a base di potencial pa dirigente un mundo na lamento.
Si nos bay na e forma cu Kamala Harris ta wordo presenta como un candidato pa Presidente di Merca, lider mundial, nos ta wordo confronta cu razanan cu ta topa y uni den e figura di Kamala Harris. Ki garantia esaki ta duna mundo?
E Presidente Mericano ta lider di hende y no di un sexo. Aruba ta wordo dirigi pa un Prome Ministro di sexo femenino mescos cu tanto pais na mundo.
E parti pa nos mas serio den tur e desaroyonan aki, ta e hecho cu na ultimo momento Joe Biden ta dicidi cu e no ta participa mas como candidato di su partido, loke ta haci cu e tempo cu e partido Democratico tin pa presenta su candidato pa Presidente di e pais, di e lider mundial, ta sumamente cortico.
Kico ta spera Merca y mundo despues di Joe Biden? Esaki ta nos pregunta di hopi tempo, despues cu nos ta contempla desaroyonan den cual e figura di un Merca como baluarte di democracia y lider mundial, ta sumamente importante.
Durante gobernacion di Joe Biden, e Vice Presidente di Merca Kamala Harris no a haya oportunidad di profila su mes.
Joe Biden a crece den sombra di Barack Obama. Pa Kamala Harris a skirbi su historia, sin duda e mester tin un base cu ta cualifica su persona pa a alcamsa posicionnan cu el a ocupa. Pero con e lo actua den asuntonan sumamente importante, cu no tin nada di haci cu sexo y raza, den hopi instancia nos no sa pasobra Joe Biden no a duna Kamala Harris oportunidad pa profila su mes.
Pero awor na un momento crucial prome cu eleccion, haciendo uzo di raza y sexo, un posibel lider mundial ta wordo presenta na mundo pasobra na ultimo momento Joe Biden a dicidi cu e mester hala atras.
Nos conoce Merca di Noord pa Zuid, di pariba pa pabou como baluarte di democracia.
Pesey nos mester cuestiona loke Presidente saliente Joe Biden ta laga atras como su herencia como lider mundial pa Merca y mundo, y e forma cu mna ultimo momento el a entrega bastuta pa Kamala Harris bira candidato di Presidente di Merca pues lider mundial.
Algo unico den historia politico di Merca, un lider mundial!
