Customs and Border Patrol ta conseha viaheronan pa tuma nota
ORANJESTAD (AAN): Autoridadnan di US Customs and Border Protection (CBP), ta consehando pasaheronan, cu e rekesitonan di US Centers for Disease Control and Prevention (CDC) pa cachonan cu ta drentando Merca, lo cambia entrante Diahuebs 1 di Augustus 2024.
“Temporada di viahe di verano ta keto bay biento en popa, y pasaheronan cu ta viaha cu cacho mester ta na altura cu dia 1 di Augustus, rekesitonan nobo pa importa cacho stipula door di CDC di Merca lo wordo implementa pa salbaguardia salud publico.” Esey ta loke Gregory Alvarez, kende ta CBP Director of Field Operations na ciudad di Atlanta a laga sa. “Nos ta urgi tur hende pa nan pone nan mes na altura cu e rekesitonan nobo aki, pa sigura un entrada suave y eficiente.”
Tur cos a cuminsa dia 13 di Mei cu a pasa, ora cu CDC a publica nan reglamentonan nobo pa importa cacho, y poni riba e Federal Register. E reglanan aki a wordo posponi temporalmente, pero lo stop dia 31 di Juli. Esey nifica cu e siguiente dia, 1 Augustus e lo ta valido. Esnan cu kier mas informacion por check e website:
CBP ta encurasha publico pa usa e website pa por usa e herment di CDC cu yama ‘DogBot’ pa determina ki regla ta aplicabel na bo cacha, basa riba e fechanan di viahe y for di unda bo cacho ta yegando Merca. Si bo no logra cumpli cu e rekesitonan aki, e lo pone cu nan lo prohibi e cacho di drenta, y lo wordo debolbi pa e pais di origen.
Tin un website tambe unda bo por haya sa si acaso bo pais ta riba e lista di ‘riesgo’ pa viaha pa Merca of no, y kico bo tin di bay haci pa asina logra haya permiso pa drenta Merca cune. E lista di paisnan high-risk ta poni na e website aki:
Simplemente Merca kier evita cu cachonan ta yegando e pais procedente di paisnan unda tin e malesa di rabia (‘rabies’) na gran escala ta plamando entre cachonan. Por ehemplo, un cacho cu ta origina di Mexico, y cu no a bishita un pais di riesgo-halto pa rabia den ultimo seis luna, lo tin di cumpli cu e siguiente rekesitonan: E mester ta por lo menos 6 luna bieu, mester tin un microchip compatible di ISO ora di viahe, un recibo di e formulario CDC Dog Import Form, y tambe varios documento mas cu ta e.o. certificacion di vacuna di rabia, di microchip, y tambe kizas certificado di salud di exportacion acepta pa USDA di Merca, y mas. Tur esaki por lesa riba e websitenan cu DIARIO a menciona na halto.
E reglamentonan ta un esfuerzo pa acelera y standariza e proceso ora di yega Merca, pues bo mester tin tur documentonan hunto prome cu bo bati na porta di Merca. Pasaheronan por usa e app mobil di CBP One tambe (ora e ta obtenible) pa declara nan mascota prome cu nan yega na un porta di entrada.
