ORANJESTAD (AAN): Awendia varios compania di refresco ta produci diferente sabor cu ta cay bao di edicion limita.
Recien na Merca por a nota cu ta wordo bendi productona cu yama ‘Pepsi Beach’, tambe ‘Dr. Pepper Creamy Coconut’, y tambe ‘Sprite Chill’. Y awor cu verano ta yegando, tin indicacion cu mas ta na caminda.
Siman pasa a wordo divulga, cu e refresco Sprite ta bin bek pa mercado Mericano un sabor cu a causa un gran furor na comienso di siglo nobo aki, cu ya caba ta creando gran expectativa.
Na comienso di añanan 2000, por corda con Sprite a crea un linea di producto yama ‘Sprite Remix’. Pa tres aña largo nan a bende refresco cu a yama ‘Sprite Remix Aruba Jam’, tambe ‘Sprite Remix Tropical’, y ‘Sprite Remix BerryClear’.
E refresconan aki ‘Remix’ ta un version di mas fruta compara cu e Sprite original. Y awor Sprite a confirma cu nan ta bin bek cu e productonan di Remix original aki bek pa un tempo limita.
Sprite Remix Aruba Jam ta bek riba e mashin conoci como “Coca-Cola Freestyle option”, esta e mashin di refresco cu ta lagabo crea bo mesun sabor di Coca-Cola cu djis primi un boton. Pero e version di ‘Aruba Jam’ aki lo wordo bendi solamente na e fast-food restaurantnan di Wendy’s na Merca.
E verano aki, Wendy’s lo ofrece e Sprite Remix Aruba Jam, cu ta wordo describi como ‘sabor di fruta’ na su mashinnan di Coca-Cola Freestyle cu tin instala den nan restaurantnan. No ta tur Wendy’s tin e mashin, pero nan a hasta crea un website pa clientenan por localisa un Wendy’s cu tine.
Como lansamento di e Sprite Remix Aruba Jam aki, e compania Wendy’s durante henter luna di Mei ta dunando clientenan bebida gratis ora nan haci compras eynan. E tin di bay via nan app.
