Atake riba Venezuela
CARACAS: Hendenan a cuminza tende avion ta bula ya for di 1:45 am caba. Pero pafo no tabata mira nada. Avionnan kizas tipo stealth, of esnan bulando riba nubianan, no tabata visibel di abao.
Segun president di Joint Chiefs of Staff, General Dan Caine a describi e operacion pa captura president Nicolas Maduro di Venezuela, como un operacion extenso y meticulosamente planea cu a hiba varios luna di preparacion y oranan largo di ehecucion riba teritorio Venezolano.
Den un conferencia di prensa na Florida, General Caine a describi e mision como un colaboracion den cual tur ramo di Forzanan Arma y agencianan di inteligencia a participa, y a rekeri varios luna di preparacion. Esaki a inclui e vigilancia di Maduro pa “compronde con e ta move, unda e ta biba, unda e ta viaha, kico e ta come, kico e ta bisti,” Caine a splica.
Algun tempo pasa a haya informacion cu CIA a instala un aparato chikito na Venezuela durante lunanan di verano, pa vigila di cerca e actividadnan di Maduro.
Ultimo ora di Diabierna anochi, segun General Caine, mas di 150 avion a lanta vuelo for di 20 diferente base militar na tera y di portavion na lama, den henter hemisferio occidental. Entre nan tabatin Helicopternan cu a transporta un forza elite di bay captura Maduro, y nan a cuminza bula rumbo Venezuela apenas 30 meter halto riba superficie di lama.
El a confirma cu e helicopternan a drenta Venezuela despues cu a caba di haci bombardeo, y nan a yega na e compleho di Nicolas Maduro pa 2:00 am. E esfuerzo pa captura Maduro y su casa a rekeri multiple “enfrentamento di defensa propio”, ya cu Venezolanonan a tira riba nan. A sali for di Venezuela bek banda di 4:29 am.
Segun General Caine, si acaso un componente so di e mision aki a faya, e lo por a trece na peligro henter e mision.
