ORANJESTAD (AAN): E siman aki a bira conoci, cu Fiscalnan Federal na Merca a haya e documento necesario,
pa asina por tuma paso pa confisca un Avion Priva luhoso cu ta pertenece na un comerciante Ruso, kende ta un parlamentario tambe conoci como e “homber di mas rico na Duma’. E avion pa colmo ta registra oficialmente na Aruba!
Ta trata di un Airbus A319-100 cu costa 90 miyon Dollar, y cu a wordo converti den un jet priva cu Andrei Skoch ta usa pa bula di un lugar pa otro. E biyonario Skoch tabata miembro di Parlamento Ruso desde 1999, y e ta poni bao sancionnan Mericano desde 2018 pasobra e tin “lazonan di hopi tempo cu gruponan criminal organiza na Ruso, y a hasta pasa tempo ta lidera un di e companianan ey,” segun Departamento di Treasury di Merca a divulga.
Despues cu Rusia a invadi Ucrania, Gobierno Mericano a trece mas sancion contra Andrei Skoch y su propiedadnan “debi cu e ta sostene e esfuerzonan di Kremlin pa viola e soberania y integridad teritorial di Ucrania”. Andrei Skoch ta wordo considera un ‘oligarch’ tambe.
Autoridadnan Hudicial na Merca a demostra cu ni maske esnan envolvi den corupcion y labamento di placa via compania falso pa trata di sconde nan propiedadnan, toch ta busca forma legalmente pa confisca esakinan.
Departamento di Husticia na Merca a bisa esey, debi cu Andrei Skoch a bira doño di e Airbus A319 via di un serie di compania ficticio y trusts vincula na su pareha romantico, segun un ordo di beslag emiti pa Fiscalnan Federal di Manhattan na New York.
Andrei Skoch a transferi pagonan na US Dollars pa registra e avion Airbus A319 na Aruba, y el a haya e matricula di P4-MGU. Tur avion registra na Aruba ta haya e matricula cu ta cuminza cu ‘P4’.
E avion priva aki aworaki ta staciona na Kazakhstan, segun Fiscalnan Federal a laga sa.
Andrei Skoch ta co-doño di e compania di hero Lebedisnky Mining, cu awor ta parti di e conglomerato Metalloinvest.
Ademas di e avion aki, e biyonario tin un Superyate di 156 miyon Dollar cu yama ‘Madame Gu’, y un helicopter modelo Eurocopter AS365 cu matricula 3A-MGU.
E biyonario a laga su Superyate bay mara na Dubai pa evita cu e ta wordo confisca. E yate ta 98 meter largo, y tin un pad pa helicopter tambe.
Andrei Skoch actualmente tin un balor di 6.2 biyon Dollar, segun e lista di biyonario di revista Forbes.
