Informacion DIARIO ta wordo confirma den tension mundial --- *Sancionnan economico 2014 tabata tin nan efecto comercial --- *E conflicto silencia, avion derumbra y e forsa di placa di Rusia
ORANJESTAD(AAN)—Ukraine ta den noticia awe na un mundo, cu e miedo pa un posibel guera mundial cu resultado grave, a mantene den silencio aunke e por a rementa cualkier momento.
E crisis na Ukraine por tin hopi resultado riba hopi tereno. Cada rato informacionnan cu DIARIO a presenta riba e tema, ta haya mas validez mientras dia ta pasa.
Cu Rusia lo hala atras ta un pregunta serio. Si sancionnan cu por wordo implementa, ta solamente un problema pa Rusia, ta de pregunta grandi cu continuamente DIARIO a presenta.
E situacion explosivo cu por tin resultado mundial, mester di bon splicacion na un mundo, cu na demasiado ocasion a pensa cu un acuerdo, ta pone fin na un menasa. Asina mundo a lubida, cu hopi di e gueranan espantoso cu mundo a conoce, a cuminsa na momento cu a firma acuerdo pa paz.
Den intentonan cu a wordo haci pa resolve loke awor a rementa, ta topa tambe cu decisionnan di paisnan importante cu no a reconoce e peso di e desaroyonan na Ukraine na un mundo caminda sigur e dictadura comunista, tin influencia grandi ya cu e ta uni militarismo, dictadura na funcionamento di un comunidad.
“Tur hende ta mescos” ta e propaganda falso cu ta wordo uza dor di comunismo of socialismo, dependiente di e palabra cu kier uza na un mundo cu kier clasifica loke ta wordo considera movemento politico cu ta uza democracia pa mata democracia.
“Tur hende ta mescos” a bira principio di comunidadnan caminda tur hende ta mescos cu excepcion di un grupo chikito cu ta logra haya mando di e pais pa asina tin tur cos.
Loke a pasa awe na Ukraine por a wordo spera for di 2013 ora e Presidente di e tempo, Yanukovich, a nenga mas integracion den Europe y tabata na fabor di Rusia.
Ukraine a reemplasa Yanukovich, cu a bay biba na Rusia, cu na 2014 a anexa Crimea cu Ukraine tabata considera partid di Ukraine, pero cu tabata tin status di estado independiente.
Mundo a tende di varios desaroyo serio, cu a keda den silencio, manera e avion di Malaysian Airlines cu a wordo derumba y e realidad cu na 2014 Rusia a invadi Ukraine oriental, supuestamente pa e sostene habitantenan cu no tabata di acuerdo cu e gobierno di Ukraine, cu a uni cu paisnan liber.
For di 2014 ya tin sancion economico contra Rusia, cu awor a wordo menasa cu sancionnan mucho mas pisa si e invadi Ukraine.
E decisionnan pa sancion contra Rusia ta wordo considera como un castigo contra cantidad di empresa Europeo cu ta haci negoshi cu Rusia.
Companianan importante, fabricantenan di productonan di renombre internacional, tin interes comercial directamente den Rusia.
Awe un crisis, cu ta crisis pero a wordo ignora como crisis, ta culmina.
Con peligroso e situacion ta, ningun hende ni pais por afirma.
E forma cu rebeldenan a tumba un avion y mata 298 persona ta papia un idioma cla.
E inversion di placa di Rusia na cantidad di pais, a haci Rusia importante pa paisnan manera Venezuela por splica. Comunismo a inverti den compra di paisnan cu placa y di pueblonan cu ideologia cu ta contra placa.
Esaki a silencia e realidad di opresion comunista, cu ta e orden capitalista di perfeccion cu ta entrega un gobierno e poder di emperador.
E situacion economico di Rusia lo afecta cantidad di compania na mundo si bini sancion, dependiente di loke lo pasa na Ukraine riba termino hopi cortico.
