Director Edwin Jacobs ta splica
*Si no e por haya suma halto di boet!
ORANJESTAD (AAN) – Na momento cu un compania tuma trahador den servicio, e tin obligacion di registra e persona aki na SVb. Asina director di SVb a señala den entrevista cu DIARIO.
“Na ki momento bo ta un trahado? Bo ta un trahado na momento cu bo no ta doño di e compania, of abo y bo cas, of bo casa no tin mas di 50% di e accionnan di e compania, bo ta wordo considera un trahado”, Jacobs a indica.
El a sigui splica cu anteriormente den e caso cu bo no tabata tin tur e accionnan bo por a inscribi como trahado. “Pero nos tin un sentencia di 2016, y a base di esey na 2022 nos a tuma e decision cu nos ta aplica e sentencia ey ora e ta bira un hurisprudencia, na momento cu bo ta un accionista mayoritario of hunto cu bo casa bo ta bira un accionista mayoritario, bo no por ta un trahado”, director di SVb Jacobs a señala.
Pero na momento cu un compania tin un trahado part time, e tin cu registr’e. Pasobra e oranan cu e ta trahando den e compania si e haya un accidente, e mester ta proteha pa e perdida di entrada cu por sosode door di esaki.
Por ehemplo si un tecnico cu ta traha cu instalacion di airco, na dado momento mester busca otro hende pa yude pa un airco grandi, y esaki ta haya accidente cu e airco ey cay riba dje, daña su lomba, y e bira paralitico, miho e tecnico tin’e asegura pa evita problemanan. Pues por registra trahado pa e periodo cu el a wordo contrata pa yuda.
Un persona por registra su compania online, y manera ta conoci tin momento cu tin trahado y tin momento cu no tin trahado. Na momento cu tin trahado e por wordo registra y kite ora no mester mas di dje.
Mescos ora un compania tin cu baha material di un container y e mester di un hende pa haci esaki, kizas un bez pa siman. Pa e momento ey e persona mester ta registra por si algo sosode. Si SVb yega eynan y e trahado no ta registra, e doño di e compania ta haya boet cu por cuminza na mas di mil florin y SVb tin full un tabla cu suma di boet riba su website, cu por companianan por informa nan mes.
