AHATA, ATA y Banco Central a constata: - ORANJESTAD (AAN) – Minister di Finanzas y Economia, Xiomara Maduro, den conferencia di prensa
a expresa su optimismo riba e recuperacion di Aruba su economia, specialmente di e pilar economico cu ta nos Industria Turistico.
E momento cu Covid-19 a drenta Aruba, cinco mil cupo di trabao a bay perdi pero aworaki, segun informacion cu el a haya di AHATA, poco poco nan ta biniendo bek y Aruba su economia tambe a cuminza lora bek.
AHATA a dune di conoce tambe cu e grado di ocupacion na hotelnan cada bez ta aumenta, y esaki ta un bon noticia, pasobra e ora ey ta surgi mas trabao.
El a agrega cu e datonan compila pa Banco Central, cu tambe ta un di e stakeholders cu e mandatario ta sinta cune cada dos siman, den e constelacion aki. E mandatario a bisa cu BCA tambe ta comparti e optimismo cu tin cerca e otro stakeholders, manera ATA y AHATA. Nan tambe ta mirando cu e turista ta lagando mas placa atras y den esaki nan ta demostra cu Aruba ta na un 70% di locual a ricibi na 2019, indicando cu e turista cu ta yegando ta lagando hopi mas placa atras, cu loke normalmente tabata e caso.
E mandatario a bisa cu esaki sigur ta bon pa nos isla, y el a remarca cu door cu Aruba ta haya turista for di Merca, unda e economia tambe ta den aceleracion cu un recuperacion hopi grandi y lihe, y banda di esaki tin e “stimulus checks” cu a wordo duna, y cu ta permiti pa mas hende consumi; pero hopi di nan ta opta pa por haci viahenan, y Aruba ta un isla turistico bunita, unda e turistanan ta sinti nan mes sigur.
Tambe pa loke ta trata e vacunacion cu Aruba a haya acceso na dje y cu a bay hopi lihe, ta duna nos bentaha, compara cu otro islanan cu tambe ta cerca di Merca, unda e turistanan ta duna nos economia e empuhe necesario y Banco Central tambe ta indica esaki, Minister Xiomara Maduro a señala.
