Noticia internacion ta mustra cu Aruba ta lider den cambio mundial
*Cooperacion den barionan necesario pa sostene esfuerzo cu a haci
*Prome problemanan practico den transicion ya conoce atencion
ORANJESTAD(AAN)—“Aruba a duna prueba cu e ta lider riba tereno di accion den cuadro di proteccion di su medio ambiente y e resultadonan cu esaki lo produci riba futuro cu ta yega cada dia mas cerca.”
Esaki ta base di informacion ricibi di expertonan cu a exigi mas investigacion pa presenta na Aruba na inicio di 2024, informacionnan cu mester asisti e comunidad Arubano riba e tereno di cambio di clima, cu lo nifica cambionan importante riba tur tereno incluso gastonan cu no solamente e pais, pero tambe ciudadanonan lo mester haci pa adapta nan mes na e realidad nobo.
E Leynan cu Gobierno di Aruba a introduci pa asina proteha e comunidad contra resultadonan cu medio ambiente maltrata ta trece cune, awe generalmente ta wordo practica y ta parti di e realidad Arubano, cu ta modelo atrobe pa mundo pero si mester di mas guia na e momentonan aki, segun informantenan.
DIARIO a prepara Aruba pa e realidad cu 2024 lo ta entrada pa un mundo di cambio grandi cu awor na tur pais di mundo ta wordo presenta den situacionnan cu mester ta modelo pa otro pais sigui.
Na Merca, por ehempel, un persona cu tabata traha den minanan di carbon, a perde su trabou pa motibo di leynan contra carbon. E no a perde tempo pero a crea un negoshi den productonan cu ta yuda crea energia alternativa.
Manera a wordo mustra na DIARIO, esaki ta prueba con hende ta ahusta su mes na e cambionan cu mundo conoce y lo sigui conoce y den cual Aruba sigur ta duna hopi ehempel di accion dirigi.
E forma cu Aruba mediante ley a corta paso di entre otro productonan di plastic ta ehemplar y ta un modelo pa cantidad di pais, caminda plastic ainda ta motibo di preocupacion serio pa futuro.
Sinembargo, ainda tin motibo pa Aruba sigui traha riba mas ley riba e tereno aki y introduci mas facilidad cu mester alivia problema cu ainda ta saca cabez.
Uno di e problemanan aki ta, e forma cu ta deshaci ainda di sushi na forma prohibi pasobra ainda tin hende cu no por a ahusta na e sistema nobo pa atende cu sushi.
Manera a wordo mustra na DIARIO, un accion cu lo deshaci di e problema aki, lo ta pa pone e bakinan grandi pa depone sushi den bario.
“Mester inventarisa y sigui informa Pueblo riba tur desaroyo,”ta bini dilanti di un informante cu a splica cu Aruba tambe a conoce un problema cu mas y mas ta bini dilanti na paisnan cu un clima cayente manera e informacionnan internacional di DIARIO ta mustra tambe.
Autonan electrico mas y mas ta haci nan entrada na Aruba y rond mundo. Uno di e problemanan cu mundialmente a wordo atribui na e vehiculonan aki ta, cu e bateria ta wordo afecta pa e clima cayente y trabou costoso di e reparacion ta e resultado.
Esaki ta hiba na e investigacion actual di DIARIO entorno e gastonan pa cual publico mester prepara su mes of ya mester haci pa cumpli cu e exigencianan cu cambio di clima ta exigi cu urgencia.
Informantenan ta papia di gastonan basico di adaptacion cu mester haci riba loke ta presente pa asina atende cu cambionan den exigencia y hasta leynan cu lo mester wordo implementa na beneficio di hende tambe.
Na un pais di clima tropical na Aruba, sigur mester pone enfasis riba e forma cu ta construi edificionan cu mester haci mas y mas uzo di ventilacion natural.
Tambe mester prepara pa e forma cu cambio di clima, cu segun cientificonan lo trece condicionnan di tempo mas agresivo, lo exigi construccion mas solido pa evita mas gasto den futuro.
Programanan mester uni barionan pa haci esfuerzonan comun mientras cu mester bini informacion dirigi riba adelanto cada programa y e resultadonan cu e ta duna pero tambe un inventarisacion di loke ta wordo considera problema diario den comunidad.
Mientras atencion di publico na e momentonan aki ta dirigi riba prijs di petroleo cu ta baha y subi, informantenan clave ta indica cu ta importante pa ciudadanonan economisa cu gasto di coriente pero cuminsa prepara nan mes pa e peso financiero cu adaptacion na exigencia nobo di clima ta exigi actualmente y lo crece den e futuro imediato.
Cambio di clima ta presenta su mes na forma rapido rond mundo y ta sigui conduci na medidanan cu Gobierno mester tuma y lo nifica gasto pa e pais, pero tambe gastonan cu lo presenta na forma individual pa ciudadanonan cu mester ahusta na futuro.
Den cuadro di e realidad aki mester bini mas guia pa publico y programanan den bario cu mester uni mas y mas den esfuersonan cu cambio di clima ta exigi.
