ORANJESTAD (AAN): Partido MEP a tuma nota di un articulo di Parlamentario Marisol Lopez-Tromp den cual atrobe e ta ataca Lider di MEP señora Evelyn Wever-Croes.
E atakenan infantil aki ta cuminsa cansa hende y ta muestra di envidia. Pero partido MEP ta haya ta importante pa reacciona, pasobra Parlamentario Marisol Lopez-Tromp ta campeon den gaña y haci comedia. Mascaruba ta keda chikito banda di dje.
Marisol Lopez-Tromp ta alega cu e tin prueba cu Prome Minister Evelyn Wever-Croes a viola ley, sinembargo tur e “pruebanan” cu el a mustra ta prueba cu Prome Minister Evelyn Wever-Croes a sali na defensa di enseñansa bou di atake di ex minister Rudy Lampe. Tur hende na ARUBA sa cuanto problema tabata tin den enseñansa. Cierto momento ni sindicato kier a papia cu e ex minister mas y eynan Prome Minister Evelyn Wever-Croes, den su calidad di Prome Minister a interveni pa trece trankilidad den enseñansa. Algo cu henter e veld di enseñansa ta agradecido p’e. Talves Marisol mester papia cu e docentenan afecta pa scucha con contento nan a keda cu e atencion di Prome Minister. Talves e ora su envidia ta baha poco.
MARISOL TA ESUN CU TA VIOLA LEY!
Marisol Lopez-Tromp tin hopi curashi di tilda Prome Minister di viola ley. Laga nos recorda Marisol kico ta violacion di ley:
- Fix tereno pa bo ruman y construi brug pa tereno di bo madushi cu placa di pueblo. Friends and Family?
- Bay cu laptop di Gobierno y nenga di trece nan bek. Ladronicia?
- Firma overtime pa hende cu no a traha overtime. Spirito?
Ta bira tempo pa Marisol Lopez-Tromp realisa cu Prome Minister Evelyn Wever-Croes tin hopi mas voto cu n’e, cu e ta e Prome Minister cu a guia nos pais den tempo di crisis y cu e ta e persona indica pa e posicion aki aworaki. Y Aruba ta hopi agradecido pa esaki.
