Na momento cu Aruba ta bay eleccion cu corupcion y tereno como temanan principal - *Cas di Madushi a cumpli cu e exigencianan legal, di efectividad y di integridad rekeri? - *Interes di kende y cuanto ciudadano a wordo sirbi cu construccion y mantencion te awe?
ORANJESTAD (AAN) — Durante e temporada di gobernacion 2017-2021, por conclui cu fiesta cu placa di Pueblo a yega na su fin. Dos factor importante ta bini dilanti, cu ta e loke Prome Ministro Evelyn Wever-Croes a presenta como base di su gobernacion cu ta integridad, mientras cu Hulanda tambe a insisti pa mundo politico di Aruba bolbe na e base sano di un estado di derecho.
Ta den e temporada di gobernacion 2017-2921, DIARIO a guia Aruba cu informacionnan cu tabata basa riba investigacionnan di documentonan oficial cu ta indica si e ley cu ta dicidi con ta gasta placa di Pueblo, a wordo respeta door di politiconan na mando sigur den e periodo di 2009 pa 2021.
Si DIARIO a scoge 2009 como su inicio di investigacion profundo, ta pasobra TUR documento y cifra oficial, ta duna prueba con placa di Pueblo a wordo abusa y con Gobierno Mike Eman y hasta miembronan di Parlamento cu a sostene Gobierno Mike Eman, a percura pa crea un situacion financiero y economico cu ta directamente comparable cu e situacion cu Covid-19 a crea cu excepcion di e hecho cu Covid-19 a cera porta pa turismo.
Den e totalidad di gastonan cu Aruba a hereda contra Ley of na forma cu ta parce di ta contra Ley, sigur ta bini dilanti e gastonan cu te awe Aruba conoce cu e brug di Madushi di Marisol Lopez-Tromp na Noord.
DIARIO a presenta imagennan di e brug cu ta percura pa hende por yega Cas di Madushi di Marisol na Noord. E imagennan aki ta prueba pa Pueblo di Aruba cu te awe e brug conoce mantencion.
Imagennan cu DIARIO ta presenta por wordo amplia y por mira un construccion sumamente costoso y profesional cu ta haci necesario pa Marisol Lopez-Tromp bin duna e votador di awe, cu no tabata conoci den hopi caso cu e proyecto Cas di Madushi, tur informacion a base di leynan di Aruba cu ta dicidi con gobernantenan ta gasta placa di Pueblo.
Pa resumi e Ley di Contabilidad, cu ta motibo pa Aruba tin instancianan oficial cu ta atende cu tur cifra di Aruba, mester trece dilanti e exigencianan di Ley aki pa gasta placa di Pueblo.
Placa di Aruba ta wordo gasta a base di un presupuesto aproba door di Parlamento. Tin un sistema di accounting di gastonan y entrada di Pueblo y tur aspecto cu ta conduci na e hecho y e forma cu ta gasta placa.
Un presupuesto ta un calculacion di gasto total di gobernacion cu ta wordo compila a base di tur entrada y gasta cu Gobierno ta spera na e diferente formanan cu tin entrada y ta haci gasto.
E resultadonan di loke realmente drenta y gasta ta bini dilanti den e Cuentanan Annual, cu ta wordo controla dor di Algemene Rekenkamer Aruba cu tin control di tur placa di loke ta gobierno directamente of indirectamente (manera subsidio).
Importante pa huzga uzo di placa di Gobierno ta, si a sigui e base legal, si a haci esaki na forma efectivo y si por papia di integridad.
Despues di e splicacion aki, ta resta solamente pa exigi Marisol Lopez-Tromp pa porfin duna Pueblo di Aruba e prueba cu e Cas di Madushi na Noord a cubri un interes nacional of sikiera di un grupo indicativo.
E construccion di e brug a costa 600 Mil Florin, mas cu Mey Miyon y e brug segun prome bista solamente ta sirbi interes di e Cas di Madushi cu mester a conoce un aumento di balor sigur despues di tur e desaroyonan di turismo na Aruba.
Awe cifranan di mantencion di e brug costoso mester subi mesa pasobra si Pueblo no mantene e brug cu su placa a paga, awa ta acumula y desastre ta e resultado pa no papia di final di e brug.
E presupuesto di Gobierno den cual e brug aki a wordo regla mester subi mesa, hunto cu henter e dossier di tur trabou y mantencion te awe pa Pueblo conclui con por ta posibel cu mas cu Mey Miyon a wordo gasta dor di Marisol Lopez-Tromp cu segun documentonan na 2020, den e rato cu e tabata Ministro, a favorece su ruman Lelicia cu ta miembr di su partido MAS.
