Den situacion mundial un bon relacion cu Reino Hulandes ta exigencia grandi - *No tin espacio pa wega cu placa cu e pais mester pa cuido medico y cuido social - *Firmesa gubernamental Wever-Croes a scapa Aruba di populismo aventurero
ORANJESTAD (AAN) — For di 2020, DIARIO a adverti Aruba cu salida for di e situacion crea pa Covid-19 y adaptacion na e normal nobo, lo no ta facil.
Durante ultimo dianan DIARIO hunto cu expertonan local y internacional, ta analisa e situacion mundial y na Aruba, cu a alcansa un punto decisivo.
E medidanan cu a wordo tuma na Aruba y na hopi pais na mundo y den esaki sigur e proceso di vacunacion, a haci cu na hopi pais desaroya, e cantidad di casonan di Covid-19 y sigur e cantidad di mortonan a baha.
Manera a wordo splica for di 2020 tambe, mundo ta drenta un normal nobo, cu ta nifica cu mundo mester keda alerta pa loke ainda por pasa cu un enfermedad cu ta conoce cambio manera tur virus y ta produci variante, pero tambe cu ainda ta un desaster na paisnan cu no conoce e desaroyo economico, financiero y social manera entre otro Aruba.
Pa un cantidad di pais na mundo y algun di nan sigur no mucho leu for di Aruba, ainda Covid-19 ta un menasa mortal enorme.
Den e normal nobo aki varios aspecto lo hunga un papel grandi. Na prome lugar, e placa cu e pais tin disponibel pa cuido medico mester subi ya cu e pais lo conoce e necesidad pa un instructura medico financiero nobo debi na e resultadonan di e enfermedad pa hende riba tereno medico manera ta e caso cu tur pandemia.
Na segundo lugar mester tin placa disponibel pa e cuido social, ya cu den e normal nobo, mester tene cuenta cu un economia cu mester sigui crece despues di a cay bou punto cero, pa asina por crea suficiente fondo pa e pais por surpasa e exigencianan di un base social aceptabel.
Den e normal nobo di Covid-19, ta mira awor e necesidad cu mentalidad Arubano semper a tene na consideracion a base di e moral Arubano. No mester gasta tur placa cu drenta den caha. No mester crea debe grandi sigur ora ya no tin placa pa paga, manera tabata e caso di Aruba for di 2010 ora mita di e entrada na BBO a wordo elimina. Mester economisa y mester por tin fondo pa por cubri gasto cu por presenta.
Ora analisa realidad financiero di Aruba, ta mira dos punto crucial.
Si Hulanda no a bati na porta di Aruba y exigi cambio di gobernacion financiero na 2014, Aruba lo a sink prome cu Covid-19 a presenta.
Si na 2017 no a bini un cambio di gobernacion y cu esaki tambe cambio den e forma cu tabata abusa di placa di Aruba, Aruba atrobe lo a sink si Aruba a sobrevivi 2014.
E cifranan cu Gobierno Mike Eman a laga atras den e presupuesto cu Reino a rechasa, hamas lo a haci posibel pa Aruba por a enfrenta Covid-19 y pa awe Aruba por subi caminda pa normalidad.
Pa por a enfrenta Covid-19, Aruba ya mester tabata tin e relacion cu Reino cu Aruba a desaroya a base di un maneho corecto di placa di Pueblo, cu no a bay tras di ningun wega politico pero hunto cu Gobierno Wever-Croes a tuma medidanan necesario cu a haci cu ya Aruba a cambia rumbo ora Covid-19 a presenta.
Awe Aruba ta den fase di recuperacion y ta papia di un stabilidad cu Aruba financieramente a perde for di 2009. Cifranan for di 2010, ora Mike Eman mes a confirma cu no por kita henter BBO mientras Hulanda mester a tuma medida nobo, ta papia un palabra cla.
Awe e base social cu Aruba tabata tin mester cu entre otro menos placa na awa y coriente, tampoco a wordo crea aunke for di 2012 por lesa di reunion na Hulanda.
Na e momentonan aki, Aruba tin stabilidad pero no un stabilidad cu ta permiti pa cera wowo y no mira peligernan cu e situacion mundial ta crea.
Aruba mester tene na e formula di Evelyn Wever-Croes cu a saca Aruba for di incertidumbre total di 2017 pa duna Aruba un rumbo, un stabilidad, na man di Reino Hulandes den un mundo di problema cu petroleo, problema di stabilidad politico, problema cu Covid-19, problema cu Aruba a sabi di vence pero a base di e maneho di realidad di Wever-Croes y no maneha di fantasia cu a destrui Aruba den pasado.
