ORANJESTAD (AAN): Manera tur aña e Manifestacion Cultural ta bay tuma lugar e aña aki riba 17 di Maart riba Plaza Libertador G.F. Betico Croes.
Durante un conferencia di prensa Diamars atardi, Junior Arends di Comision Celebracion Dianan Nacional (CCDN) a indica cu despues di discurso di Minister di Cultura Xiomara Maduro, ta bay tin presentacion di , presentacion di Ganadornan di “Festival Un Canto pa Aruba su Himno y Bandera” categoria Hubenil y Adulto, Gruponan di Baile, Poema, Show di Canto di nos artistanan local y lo cera e anochi cu nos leyenda Arubano Ataniro & Friends.
“Lo bay tin feria cu tentnan cu cuminda crioyo, bar, boca dushi, artesania y hopi mas”.
Un anochi cultural espectacular dedica na nos pais Aruba. Esaki lo wordo transmiti en bibo pa canalnan di television local y otro medionan, segun Arends.
El a sigui bisa cu Diabierna 18 di Maart 2022 riba
Plaza Libertador Betico Croes ta bay sigui cu e celebracion, unda cu ta inicia parti mainta cu presentacion di musica sigui cu yegada di mandatarionan, unda cu ta bay tin un acto protocolar cu discurso di Prome Minister di Aruba y presentacionnan musical di coro di muchanan, poesia, ganador “Poeta di Patria” y ganador di “Festival Un Canto pa Aruba su Himno y Bandera Categoria Infantil”.
E biaha aki ta permiti pa publico por ta presente. E acto protocolar lo wordo clausura cu un desfile di gruponan uniforma, manera scouting, padvinders gilde y gruponan gubernamental uniforma.
Esaki tambe lo wordo transmiti en bibo pa canalnan di television local y otro medionan.
Segun Arends e aña aki lo haci un produccion digital cu lo tin como titulo “Conoce mi Himno, mi Bandera y mi Escudo” cu lo wordo manda pa scolnan pa asina tur alumno di scolnan preparatorio, basico y enseñanza special tin informacion digital y na forma innovativo.
E video aki ta un material educativo y ta un preparacion pa tur alumno di scol basico pa e Competencia Nacional ‘Kibra Coco’ (Quiz), edicion Dia di Himno y Bandera.
Scolnan Preparatorio:
Ta bay organiza tambe un competencia di “Un Rima pa mi Isla”.
Esaki ta un competencia pa klasnan di scolnan preparatorio.
E reglanan ta lo siguiente:
- E rima mester contene 4 verso (regel);
- E rima mester ta na Papiamento;
- E rima mester expresa un mensahe relaciona cu Aruba su Himno y Bandera
- Tur klas por participa;
- E docente ta graba su muchanan cu telefon/Celular y manda e video na عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. Comision organisatorio lo load esaki riba FB di CCDN;
- Ultimo dia pa entrega e video ta diaranson 16 di maart 2022
- Ganador lo presenta nan Rima durante nos “live show”
Tur aña Ministerio di Cultura hunto cu CCDN ta contribui cu diferente organisacion cu ayudo financiero, logistica pa nan por organiza nan evento y ta promove esaki riba e Calendario Cultural.
E aña aki ta introduci e programa na television ‘Kibra Coco’, esaki a resulta un exito Dia di Betico. E programa di competencia virtual aki tambe lo wordo organiza Dia di Himno y Bandera, caminda tur mucha di scolnan basico por participa hunto cu famia for di nan sala di cas y asina celebra Dia di Himno y Bandera.
E competencia aki lo tuma dia 19 di Maart proximo, cuminsando pa 5or di atardi via nos canal di television. Alumnonan di scol basico por participa y gana premio pa nan mes, nan famia y nan klas. E programa lo consisti di 3 tanda di serie di pregunta y lo wordo conduci pa e anfitrion.
