SAO PAULO: Un biaha mas atrobe golpi a cay! Cos no ta cana asina bon pa señora Nadine Gonçalves di 54 aña, y su pareha Tiago Ramos... un hoben di apenas 24 aña di edad.
Nadine ta mama di e famoso futbolista Neymar, y el a bolbe bira victima di violencia di famia, ora cu su boyfriend Tiago Ramos a atake cu hopi forza. E pareha aki ta hunto desde mey-mey di 2020.
E biaha aki, e acontecimento a socede despues cu Nadine a huur un apartament pa biba cu su boyfriend hoben. Pero e agresion fisico causa pa e hoben contra e mama di e futbolista, a socede despues cu e dama a nenga di cumpli cu algun demanda di Tiago, y esey a pone e hoben perde cabez y a cuminza agredi verbalmente y tambe fisicamente.
Esaki a pone cu e muher a haye ta core bandona e apartamento pa asina evita cu e situacion ta sali for di control, y a hasta pidi Security di e edificio pa nan no laga e hoben drenta pa ningun motibo. Esaki a pone cu e hoben a bira mas furioso ainda, y esaki a pone cu Security a haya nan obliga di interveni den e problema.
Bisiñanan di e mama di e futbolista a bisa prensa cu nan tambe a tende grito, insultonan pisa, y tambe sonido di boternan cu ta cay kibra na suelo, y voz di un muher yorando, y nan ta convenci cu ta Nadine tabata yorando.
Esaki no ta e prome biaha cu e pareha a haya nan den un escandalo di e tipo aki. Na 2020 caba nan a wordo atendi na Hospital debi na un pelea pisa na cas, unda Polis mester a bay atende nan.
Na 2020, e futbolista Neymar a keda hopi disgusta pa loke ta pasando, y a insulta e hoben modelo den un mensahe riba Social Media, refiriendo na su condicion sexual, pasobra e pareha di su mama ta bisexual y a yega di confesa cu e tabatin relacion cu homber prome cu el a conoce Nadine.
