Parlamentario Carlos Bermudez a bati alarma
- Trahadornan ta bira victima di bullying
- Hopi discriminacion y abuso verbal
ORANJESTAD (AAN): Parlamentario Bermudez di AVP, a divulga na prensa cu varios empleado den e sector hotelero a acerc’e cu preocupacion serio, reclamo y decepcion profundo. Situacionnan cu, segun Bermudez, a lag’e completamente sorprendi y preocupa.
Aki ta trata di trahadornan balente, cu a dedica hopi aña di nan bida na e sector hotelero. Hopi di nan, pa miedo di perde nan trabao, a opta pa keda keto. Pero e silencio aki no por wordo interpreta como sifuera cu tur cos ta bon. E situacion actual ta inaceptabel y mester atencion awo.
E mas preocupante ainda ta cu tin empleado cu ni sikiera ta confia pa acerca nan sindicatonan, pasobra nan tin e percepcion cu e problema nan ta conoci pero nada concreto ta wordo haci. Esaki ta un señal alarmante. Kisas esaki tambe tin di haber cu e miedo di perde trabao.
Banda di e sindicatonan, e responsabilidad ta cay tambe riba AHATA y riba Gabinete AVP-FUTURO (lesa: Minister di Turismo y Labor), cu tin un rol clave pa proteha e trahadornan.
Entre e denuncianan cu a yega na oido di Bermudez tin:
(*) Bullying y harassment na pia di trabao.
(*) No cumplimiento cu e salario minimo legal (11,58 Florin pa ora).
(*) Discriminacion (incluyendo riba base di rasa).
(*) Trato desigual entre empleado.
(*) Abuso verbal.
(*) Carga di trabao excesivo. Mester haci mas cu loke e descripcion di trabao ta prescribi.
(*) Falta di respet y reconocemento.
(*) Falta di oportunidad pa promocion.
(*) Abuso di poder door di managernan cu falta conocemento di leynan laboral.
(*) Contract y periodo di prueba ilegal.
(*) Pago total inferior na e salario minimo legal.
(*) Uzo di tip pa completa salario minimo (cual ta contra ley).
(*) Menaza den direccion di empleado cu ta expresa nan descontento.
(*) Falta total di perspectiva pa cu crecemento profesional.
(*) Preferencia pa stranhero en bes di promove talento local.
Un situacion particular y grave ta cu tin caso caminda e salario minimo ta wordo “completa” cu tip. Esaki no solamente ta ilegal, pero ta crea un problema adicional: e tip no ta reconoci como entrada fiho, cual ta haci cu empleadonan no por haya un prestamo bancario pa por yega na por ehempel un cas of auto.
Den hopi caso, trahadornan local cu tin mas experiencia y conocemento di e sector, no ta wordo tuma den consideracion ora tin vacatura, mientras cu ta prefera busca personal di afo. “Nos no por sigui tapa wowo pa maltrato di nos propio hendenan,” Bermudez a enfatisa. “Si nos permiti esaki, nos ta manda un mensahe cla: cu interes personal ta bay riba bienestar di trahadornan.”
Parlamentario Bermudez ta reconoce e importancia di e sector hotelero pa cu e economia di Aruba, pero ta subraya cu desaroyo economico no por bay a costo di dignidad humano.
Yamada urgente pa accion: Bermudez ta haci un suplica fuerte na Sindicatonan, AHATA, y Minister di Turismo y Labor pa tuma responsabilidad y actua sin mas tardanza. Ban uni pa por yega na un win-win situation.
Bermudez ta urgi minister di Turismo y Labor pa desaroya y implementa un plan di inspeccion specifico pa sector hotelero, cu lo enfoca riba:
- Control efectivo na pia di trabao.
- Cumplimento cu leynan laboral.
- Proteccion di e trahadornan contra abuso.
- Introduccion di un Tip-Lijn (anonimo).
- Garantia di un ambiente di trabao digno, humano y seguro.
“Un empleado cu ta ser respeta y balora, lo semper duna mas. Esaki no solamente ta beneficia e empresa, pero tambe Aruba en general.” Bermudez a conclui cu un yamada na unidad y responsabilidad: “Ban gara e toro na su cacho. Hunto nos por logra cambio real. E bon comun lo beneficia nos tur.”
