Na Curaçao
ORANJESTAD (AAN): Informacion di Curacao ta indica cu Maduro & Curiel’s Bank (MCB) a anuncia un futuro transicion di liderazgo.
Lionel “Chicu” Capriles II, kende ya pa 2 decada ta Presidente y CEO, a anuncia su intencion di bay retira. MCB su Hunta di Comisario a cuminsa e proceso pa haya un sucesor pa lidera MCB Group.
Den un aclaracion riba su decision, Chicu a bisa: “Ta un berdadero honor pa lidera nos Grupo MCB, pa traha cu coleganan asina extraordinario, y humilde di ta den un posicion pa haci contribucionnan asina importante na e comunidadnan cu nos tin placer di sirbi y yama cas. Despues di casi 33 aña di servicio na Banco, sinembargo, ta tempo pa mi pasa e batuta pa un lider nobo. Banco ta fuerte, resiliente y solido y nos compromiso pa sirbi nos clientenan den e comunidadnan cu nos ta orguyoso di por yama nos cas, ta firme. Door di anuncia e decision aki adelanta, nos Hunta di Comisario tin suficiente tempo pa busca un sucesor adecua. Mientras tanto ta ‘business as usual’, paso mi ta keda traha cu tur mi energia y dedicacion pa asina sigura un transicion facil pa mi sucesor na su debido tempo”.
Islay McGlynn, Presidente di e Hunta di Comisario a declara: “Bao di liderazgo di Chicu, MCB a continua cu su trayectoria fuerte di crecimento. Como e Banco di Caribe Hulandes, MCB ta activo den e economianan y comunidadnan den cua e ta opera. Chicu a mantene su promesa di tene e valornan di famia, cu ta sinonimo na Banco for di dia esaki a keda estableci na 1916, halto. Mientras Chicu ta continua su rol pa algun tempu, nos ta cuminsa e proceso pa haya e siguiente Presidente y CEO di MCB. Esaki ta subraya e importancia pa haya un lider adecua”.
E Hunta di Comisario a cuminsa un proceso diligente y bon planea pa identifica un sucesor, di cua por spera un anuncio den e proximo 12 lunanan. Ta busca un candidato kende ta compronde e balornan di e famia di MCB, ta compromete su mes na e economia y comunidadnan di nos islanan den Caribe Hulandes y cu ta capacita pa lidera e Banco den futuro.
Prioridad di e Hunta ta pa sigura un transicion suave y transparente, cu ta mantene e tradicion di stabilidad, excelencia y servicio di MCB.
