Lisette Gomes di Fundacion “Mi voz ta bo voz”:
*MVTBV lo tin diferente charla
ORANJESTAD (AAN) – Lisette Gomes, di Fundacion “Bo voz ta mi voz”, a menciona den entrevista cu DIARIO cu e casonan di abuso sexual di mucha no a baha, y tin diferente factor cu ta hunga un rol den esaki. E fundacion ta preparando pa e Luna di Concientizacion riba abuso di Mucha en general, cu ta Luna di April.
Gomes a indica cu nunca por tin cifra exacto tocante cuanto caso di abuso sexual tin, pasobra tin casonan cu por ta, ta yega na e fundacion pero semper nan ta conseha pa haci denuncia, locual ta e prome stap, ya cu ta hopi importante pa e persona mes haya su proceso pa e castigo pa e agresor, pa e hendenan sa ken ta bezig cu esaki.
Tin casonan cu no ta yega Corte tampoco, door cu OM ta bisa cu no tin suficiente prueba, pero e aña aki tin varios caso andando caba. Siman pasa e Fundacion a haya tres caso reciente cu ta den proceso, pero tin casonan bieu tambe.
Lisette Gomes a indica cu e fundacion su trabao ta pa conseha gobierno, entrega proyecto, etc., y wak unda tin buraco den e sistema pero nan kier acentua mas tanto den e parti preventivo.
Tocante e aspecto preventivo no ta wordo papia, segun señora Gomes ta indica. El a agrega cu e fundacion ta bezig cu diferente proyecto cu diferente instancia pa wak con nan por yega na otro, pa nan por cera y uni pa e parti preventivo.
E comunicacion di e fundacion cu instancianan ta hopi bon. Ora cu tin caso nan tin comunicacion cu Jeugd en Zeden Politie (JZP). E Comision ta bezig cu Hof di parti di Corte, pa un forum pa duna informacion pa e veld por sinta hunto, pero pa comunidad tambe por haya informacion y haci cierto preguntanan, por ehemplo di con ta yega na cierto castigonan y kico ta e problema cu tin hende no ta haya hopi castigo, etc. Kiermen, pa tur hende ta riba mesun liña y ta bon informa eyfo con e proceso ta, pero no solamente esey pero pa yega na e parti preventivo.
Lisette a splica cu Luna di April ta e luna di prevencion di abuso di mucha en general. E fundacion tin un par di aña enfoca riba dje, y e ta bezig cu tayernan di trabao pa otro luna, y tur hende por keda pendiente di e facebook di “Mi voz ta bo voz” unda lo duna informacion tocante cual lo ta e fechanan. Nan lo cuminza di dia 2 di April en adelante. Nan kier drenta diferente bario, duna charlanan den e MFAnan, manera dos aña pasa cu a haya hopi acogida.
