Vocero Robby Rosel, di BCI ta reconfirma:
ORANJESTAD (AAN) – Durante e temporada di Siman Santo di e aña aki, ta ser spera un cantidad inmenso di persona riba beach, no solamente esnan cu tin vergunning pa campa, pero mas tanto esnan riba pia cu tambe a registra, y esnan cu no a registra. Ya caba Vocero Policial Lito Lacle a declara esaki den un entrevista, na inicio di siman.
Tambe e vocero di Bureau City Inspector, Robby Rosel, a reconfirma cu un cantidad grandi di hende ta bay ta riba beach, y tin hopi peticion di permiso, cu a wordo entrega na Cuerpo Policial, mescos cu pa meter di awa tin un cantidad grandi di peticion. Rosel a tuma contacto cu WEB Aruba NV y e compania ta bisa cu sigur, e area unda mas a solicita e aña aki ta entre ex-Bushiri Hotel cu Divi Divi. Tambe na Seroe Colorado y Rodger’s Beach tin hopi peticion cu a wordo haci, pa loke ta pariba di brug.
E dos areanan aki lo wordo uza pa campamento y pa pone meternan di awa, unda e parti pabao di Rodger’s Beach ta keda pa publico, mientras cu Baby Beach ta bira e parti central pa campamento, cuminzando na e piscina cu tin den e edificio y di eynan bay full te Rodger’s Beach, patras di Santana di Cacho. Henter e area aki ya caba tin meternan di awa, cu WEB a pone.
Pa loke ta trata ponemento di bari di sushi, cu ta hopi importante tambe, Rosel a splica. El a purba pa trece Serlimar como invitado pa ta presente hunto e team di BCI. El a trata di contacta e PR, pero no a haya ningun contesta.
Solamente, Robby Rosel a haya sa cu Serlimar lo ta bendiendo tambe e barinan di sushi, pa hendenan por tira desperdicio aden. Mescos ta e caso di Eco-Tech, cu a bin cu un prijs special e biaha aki.
Rosel a subraya cu ya pa inicio di siman tabata tin basta tent ta bay laira, basta trailernan cu a yega, aunke e area di San Nicolas ta un poco slow ainda, parti pabao tin varios cu a wordo ubica caba, y mirando cu scol ta cera diahuebs, sigur tur e beachnan lo ta hopi druk. “Y mas cu claro, abo cu ta haya bo saco for di e Inspectornan di Bureau City Inspector, ricibi esaki cu cariño for di nan, pasobra sea bo ta tira desperdicio den e saco of den e bari di Serlimar”, PR Robby Rosel a conclui haciendo un yamada pa mantene e beachnan limpi.
